ABRIL 16, 2025 — Naglabas ang Department of Trade and Industry (DTI) ng mas mahigpit na patakaran para sa online na pagbebenta ng vape at novel tobacco products, kung saan kailangang magrehistro muna ang mga mamimili bago makabili — isang hakbang para maiwasang maabot ito ng mga menor de edad. Pero tutol ang mga eksperto sa kalusugan, na nagbabala sa mga delikadong epekto ng vaping, lalo na sa mga kabataang Pilipino.

Ayon sa bagong patakaran, dapat tiyakin ng mga online platform ang edad ng mga bumibili bago payagang ma-access ang mga vape, device nito, o novel tobacco products. Binigyang-diin ng DTI na dapat may epektibong age-gating measures. Ibig sabihin, walang makakabili nito na wala pang 18 taong gulang, kahit pa may tulong ng nakatatanda.

Sa ilalim ng bagong patakaran ng DTI (Department Order No. 25-04), kailangang magrehistro muna ang mga mamimili sa e-commerce sites bago makatingin o makabili ng vape, e-cigarettes, o novel tobacco products online. Apektado rin ang mga website, app, at pati mga ads — walang rehistrasyon, walang access.

Giit ng order: "A measure denying access to individuals below 18 years of age or an age-gating measure shall be considered effective if the individual below 18 years of age cannot access and/or purchase from an internet website, e-commerce and/or other similar media platform that sells, distributes, or advertises vaporized nicotine and non-nicotine products, their devices and novel tobacco products at any given time and without any assistance from another who is 18 years or older."

(Ang isang hakbang para pigilan ang access ng mga indibidwal na wala pang 18 taong gulang o age-gating measure ay ituturing na epektibo kung hindi makaka-access at/o makakabili ang isang indibidwal na wala pang 18 taong gulang mula sa internet website, e-commerce, at/o iba pang katulad na platform na nagbebenta, namamahagi, o nag-a-advertise ng vaporized nicotine at non-nicotine products, ang kanilang mga device, at novel tobacco products sa anumang oras at walang tulong mula sa isang taong 18 taong gulang pataas.)

Kasunod ito ng pansamantalang pagbabawal sa online vape sales noong Hulyo 2024, nang matukoy ng DTI na maraming platform ang hindi sumusuri nang maayos sa edad ng mga mamimili. Ngayon, kailangang patunayan ng mga seller na sumusunod sila sa age checks at iba pang legal na requirements bago muling makapagbenta.

Pero hindi kumbinsido ang mga doktor na malulutas nito ang mas malaking problema: ang patuloy na pagdami ng kabataang nahihilig sa vaping. Ayon sa datos ng Sin Tax Coalition, mula 37,513 na young vapers noong 2021, umakyat ito sa mahigit 423,000 noong 2023. Iginiit ng mga health group na agresibong tinatarget ng mga vape company ang mga kabataan, at  namimigay pa nga ang mga ito ng libreng samples sa mga bar at club.

Naka-link ang vaping sa pinsala sa baga, nicotine addiction, at cardiovascular diseases. Kamakailan lang, lumabas sa isang ulat na ang alcohol, tobacco, at vaping ay nag-aambag sa 115,000 na pagkamatay ng mga Pilipino taun-taon.

Habang layon ng bagong patakaran ng DTI na ma-regulate ang pagbebenta, iginiit ng mga health advocate na ang kamalayan — at mas mahigpit na pagpapatupad — ang susi para maiwasan ang lumalalang public health crisis.

(Larawan: Philippine News Agency)