ABRIL 25, 2025 — Sa gitna ng mga kawalang-katiyakan sa pandaigdigang ekonomiya, itinutok na ng Ayala Land Inc. ang pansin sa high-end na real estate. Umaasa sila sa lumalaking affluent class ng Pilipinas para patuloy na umangat. Habang nagdudulot ng hamon ang mga panlabas na factors tulad ng trade tensions at pagbabago ng interest rates, mas malakas ang pagkakataon para sa property giant sa premium segment.

Sinabi ni Ayala Land President at CEO Anna Ma. Margarita Bautista-Dy, “Our focus on the premium segment will continue … specifically, the premium segment and more horizontal developments.”

(Patuloy ang aming pagtuon sa premium segment … partikular, ang premium segment at sa mas maraming horizontal developments.)

Napansin niya na pitong beses tumaas ang benta ng luxury mall na Greenbelt mula noong 2019. Nagpapakita ito ng malakas na demand mula sa upscale consumers.

“There is indeed wealth being created in the country … A lot of our buyers are business owners,” dagdag ni Dy.

(Talagang may yaman na nalilikha sa bansa … Marami sa aming mga buyers ay negosyante.)

Ipinakita ng datos ng kumpanya na 72% ng mga bumibili sa kanila ay lokal, habang overseas Filipinos at foreign nationals naman ang bumubuo sa natitira.

Ipinaliwanag pa ni Dy na “middle market continues to have some challenges, not just in terms of interest rates being stickier than what we would have wanted, as well as some oversupply in particular segments and particular geographies.”

(Patuloy na may hamon ang middle market, hindi lang sa interest rates na mas malayo sa gusto namin, pati na rin sa oversupply sa ilang segment at lokasyon.)

Bukod sa residential projects, pinalalawak din ni Ayala Land ang benta ng commercial at industrial lots. Noon, 10% lang ng benta ang galing dito, pero may potensyal pa itong lumago.

Noong 2024, nakapagtala ang Ayala Land ng P28.2 bilyon na net income, 15% na taas mula sa nakaraang taon. Ngayong taon, balak nitong lumago nang doble sa GDP rate ng bansa — ibig sabihin, kung 6% ang paglago ng ekonomiya, 12% ang target nila. Para pondohan ang expansion at bayaran ang utang, magtataas sila ng P55 bilyon sa 2025.

(Larawan: Facebook)