ABRIL 25, 2025 — Nagsimula nang kumilos ang Meralco patungo sa nuclear energy sa pamamagitan ng kanilang bagong Nuclear Energy Strategic Transition (NEST) program. Ipinakita ito sa Giga Summit 2025, kung saan layunin nilang galugarin ang ligtas at sustainable na nuclear solutions — kasama na ang posibleng pagbuhay sa matagal nang natutulog na Bataan Nuclear Power Plant.

Bakit nuclear? Dahil sa patuloy na pagtaas ng pangangailangan sa enerhiya, nakikita ng Meralco ang nuclear power bilang isang maaasahan at low-carbon na alternatibo.

Binigyang-diin ni Chairman Manuel Pangilinan ang pangangailangan ng malakas na polisiya mula sa gobyerno. Aniya, “We’re touching base with a number of countries familiar with nuclear energy like France. We signed an agreement two to three weeks ago with EDF (Électricité de France) with the French ambassador. We’re talking to the US government on how we can get assistance in terms of nuclear energy in this country.”

(Nakikipag-ugnayan tayo sa mga bansang bihasa sa nuclear energy tulad ng France. Dalawa o tatlong linggo ang nakalipas, pumirma tayo ng kasunduan kasama ang EDF at ang French ambassador. Kinakausap din natin ang US government para humingi ng tulong pagdating sa nuclear energy sa bansa.)

Kasabay nito, naghahain ng partnerships ang Meralco sa mga global players tulad ng EDF ng France, nuclear operators ng South Korea, at mga developer ng small modular reactors (SMRs) mula sa US. Ang SMRs — maliliit na nuclear "batteries" na kayang mag-produce ng hanggang 300 MW — ay maaaring maging game-changers, bagaman aminado si Pangilinan na maaaring hindi pa dumating at magamit ang mga ito bago ang 2030.

Hindi lang teknolohiya ang pinaghahandaan ng Meralco kundi pati ang kaalaman. Noong nakaraang taon, nagpadala sila ng limang scholars sa ilalim ng FISSION program para mag-aral ng nuclear engineering.

“These bold steps are driven not just by infrastructure, but by intellectual readiness,” pahayag ni Ronnie Aperocho, MPA President at Meralco Chief Operating Officer.

(Hindi lang imprastraktura ang dahilan sa mga hakbang na ito, kundi pati ang paghahanda sa kaalaman.)

Dumating ang hakbang na ito habang naghahanap ang Pilipinas ng mas malinis at maaasahang enerhiya. Bagaman may mga hamon pa — tulad ng regulasyon, pananaw ng publiko, at gastos — maaaring maging pioneer ang bansa sa Southeast Asia pagdating sa nuclear energy kung magtagumpay nga ang Meralco.

(Larawan: CBCPNews)