MAYO 9, 2025 — Binigyan ng prayoridad ng gobyerno ang tatlong malalaking offshore wind projects ng BuhaWind Energy Philippines para mapabilis ang pag-unlad ng mga ito habang nagmamadali ang bansa na palakasin ang renewable energy capacity.

Itinuring ng Department of Energy (DOE) bilang "energy projects of national significance" (EPNS) ang 2,000-MW Northern Luzon, 1,000-MW Northern Mindoro, at 1,000-MW East Panay projects. Ang designation na ito ay magpapadali sa pag-apruba ng mga permit sa iba’t ibang ahensya, at makakapagbawas sa mga bureaucratic delays.

Binigyang-diin ni Louie Mark Limcolioc, hepe ng legal at corporate affairs ng BuhaWind, ang kahalagahan ng hakbang na ito: “[These] should expedite the processing of all other permits, especially for our priority Northern Luzon offshore wind project, by other government agencies.” 

(Dapat nitong mapabilis ang pagproseso ng lahat ng iba pang permit, lalo na para sa aming priority Northern Luzon offshore wind project, sa iba pang government agencies.)

Target na mapatatakbo ang Northern Luzon development sa 2030, susundan naman ng Northern Mindoro sa 2031, at ang East Panay sa 2033.

Ang BuhaWind — isang joint venture ng Denmark’s Copenhagen Energy at lokal na firm na PetroGreen Energy Corp. — ay isa sa walong developers na pinili para sa offshore wind expansion. Saklaw ng mga proposed sites ang Negros Occidental, Ilocos Norte, Batangas, at iba pang coastal regions.

Plano ng DOE ang ikalimang green energy auction sa huling bahagi ng 2025, na prayoridad ang offshore wind para maabot ang 35% renewables target nito pagsapit ng 2030 mula sa kasalukuyang 22%. Pero nagbabala ang Global Wind Energy Council na kailangang resolbahin ang mga infrastructure gaps at financing hurdles para maakit ang mga investors.

Ngayong mabilis na ang pagproseso ng mga permits, maaaring maging turning point ang mga proyektong ito sa clean energy transition ng Pilipinas — kung magiging katumbas ng ambisyon ang execution.

(Larawan: BuhaWind Energy Philippines)