MAYO 9, 2025 — Ipinahayag ng Manila Water Company Inc. ang malaking pagtaas ng kita nito para sa unang quarter ng 2025. Umakyat ang net income sa ₱3.6 bilyon — 14% na paglago kumpara noong nakaraang taon. Dahil ito sa mas mataas na taripa sa east zone operations at magandang performance ng mga negosyo nito sa ibang rehiyon.

Lumago ang revenue ng 8% sa ₱9.5 bilyon, na hatak ng adjusted water rates sa east zone concession na nag-ambag ng ₱7.6 bilyon. Binanggit ng kumpanya ang ikatlong phase ng tariff rebasing program nito, na ipinatupad noong Enero, bilang isa sa mga pangunahing dahilan. Samantala, 16% ang pagtaas ng kita sa non-east zone operations sa Pilipinas na nasa ₱2.2 bilyon, at nagpapakita ng tumataas na demand sa mga probinsya.

Nagdeliver din ang overseas ventures nito, na umabot sa ₱124 milyon ang equity earnings. Naglaan ang utility firm ng ₱4.8 bilyon para sa mga infrastructure projects, na nakalaan karamihan sa east zone.

"These investments involve projects to augment water supply, ensure reliable service, and continue expansion of wastewater treatment capacity and coverage," pahayag ng kumpanya.

(Kabilang sa mga investment ang mga proyekto para dagdagan ang suplay ng tubig, masiguro ang maaasahang serbisyo, at palawakin pa ang wastewater treatment capacity at coverage.)

Ipinakikita ng resulta ang agresibong hakbang ng Manila Water para palakasin ang operasyon nito sa gitna ng tumataas na konsumo at mga pagbabago sa regulasyon.

(Larawan: Manila Water)