HUNYO 10, 2025 — Diretsong sasabak ang Home Development Mutual Fund (Pag-IBIG) sa pagpapatayo ng mga bahay, hindi lang sa pagpopondo, para matugunan ang malaking kakulangan sa abot-kayang tirahan. Makakipag-ugnayan sila sa mga developer at iba't ibang ahensya ng gobyerno para mas mapabilis ang pagdadagdag ng supply.

Ibinahagi ni Pag-IBIG deputy CEO Benjamin Felix ang plano sa isang media briefing, na marka ng unang pagkakataon na mismong ang ahensya ang sasabak sa paggawa ng pabahay.

“Almost one-third of our loan take-out is socialized, but right now, no one is producing. That is why we are trying to partner with developer contractors to produce socialized housing to augment supply,” aniya

(Halos isang-katlo ng mga pautang namin ay para sa murang pabahay, pero ngayon, walang gumagawa. Kaya nagsisikap kaming makipagtulungan sa mga developer para makapagdagdag ng supply.)

Target ng Pag-IBIG na maglabas ng P156.86 bilyon sa home loans ngayong taon para makapagpondo ng mahigit 111,000 bahay. Pero hanggang Mayo, P49.48 bilyon pa lang ang naaprubahan — 30% pa lang ng taunang target. Noong nakaraang taon, P130 bilyon ang nailabas nito, kulang ng P13 bilyon sa P143 bilyong goal.

Pinapabilis nila ang progreso sa pamamagitan ng joint ventures sa mga pribadong developer at shelter agencies, kasama ang National Housing Authority. Binanggit ni CEO Marilene Acosta ang panawagan ni housing czar Jose Ramon Aliling na palawakin ang 4PH program, lalo na sa horizontal developments tulad ng townhouses.

“Developers have also committed to aggressively continue their socialized housing and other projects,” dagdag niya.

(Nangako rin ang mga developer na itutuloy nila nang masigasig ang kanilang mga proyekto para sa murang pabahay.)

Inaalok ng Pag-IBIG sa ilalim ng Affordable Housing Program ang subsidized na 3% interest rate para sa mga pautang hanggang P850,000 sa socialized subdivisions. Kahit kaya nilang mag-apruba ng hanggang P6 milyon, igiiniit ni Acosta na ang prayoridad ay ang mga low-income borrowers.

“If we just want to hit the P157 billion, we can actually increase our loan value from P10 to P20 million. But it does not solve the real problem of helping those in need,” aniya.

(Kung gusto lang naming maabot ang P157 bilyon, pwedeng dagdagan ang halaga ng pautang. Pero hindi nito malulutas ang tunay na problema ng mga nangangailangan.)

May 16.58 milyong aktibong miyembro ang Pag-IBIG at halos 40% ng home mortgages sa bansa ay hawak nito. Malinaw ang misyon sa pagbabago nito mula sa pagpopondo patungo sa pagpapatayo ng mga bahay: kailangang simulan sa pinakapundasyon para masolusyunan ang krisis sa pabahay.

(Larawan: Pag-IBIG Fund (HDMF) | Facebook)