HUNYO 17, 2025 — Kinumpirma ng Department of Transportation (DOTr) ang plano na magdagdag ng bagong istasyon sa Talaba, Bacoor, sa LRT-1 Cavite Extension project, bilang tugon sa hiling ng mga lokal na opisyal.

Ipinaliwanag ni DOTr Secretary Vince Dizon na malaki ang potensyal ng lugar para sa development, kaya makabuluhan ang pagdagdag ng istasyon.

"This was a request by Bacoor and it makes sense because (Hiling ito ng Bacoor at makatuwiran dahil) yung Talaba station ay doon sa area kung saan yung new development ng Bacoor City," sabi niya sa EJAP Infrastructure Forum sa Makati.

"Hindi ko sinabing malaki na ngayon ang ridership, pero since that is future development in Bacoor then most likely you will have a potential huge partnership (pero dahil future development ito sa Bacoor, malamang magkakaroon ng malaking partnership).”

Hinihingi ng gobyerno ang karagdagang P3 bilyon para sa 2026 para sa pagtatayo ng istasyon, na matatagpuan sa pagitan ng Zapote at Niog. Naabisuhan na ang Light Rail Manila Corporation (LRMC), na nagpapatakbo ng LRT-1.

"Gobyerno ang gagastos sa istasyon tapos ipapasa natin sa LRMC para patakbuhin," dagdag ni Dizon.

Samantala, tiniyak ni Dizon na dalawa pang istasyon — ang Las Piñas at Zapote — ay target pa ring buksan bago ang 2028, kahit na may naunang problema sa right-of-way.

"Alam ko wala nang problema sa Las Piñas at sa Zapote. I think okay na yun kaya kampante tayo na matatapos na yun," aniya, kasabay ng pagbanggit na naresolba na ang alitan sa DPWH flyover project.

Inaasahang makukumpleto ang extension hanggang Niog sa 2029 o 2030, na magpapadali ng biyahe para sa mga commuter mula sa Cavite.

"That’s going to be huge for people coming from Cavite who work in Metro Manila," diin ni Dizon.

(Malaking tulong ito sa mga manggagaling pa sa Cavite na nagtatrabaho sa Metro Manila.)

(Larawan: Philippine Information Agency)