April 16, 2025 — Isang malaking achievement ang naabot ng OPM band na Cup of Joe ngayong linggo, matapos pumasok ang hit single nilang "Multo" sa Billboard Global 200 sa No. 181 spot.

Ang mapanakit na kantang ito tungkol sa pagnanasa sa isang nawalang pag-ibig ay lumampas pa sa ilang international hits gaya ng “Handlebars” nina Jennie at Dua Lipa (No. 186) at “Toxic Til The End” ni Rosé (No. 194). Isa itong malaking milestone para sa grupo, na unti-unting kinikilala sa labas ng Pilipinas.

Originally released bilang single noong 2024, agad sumikat ang “Multo” sa social media, lalo na sa TikTok, kung saan ginamit ito sa mga fan edit ng WillCa — ang Pinoy Big Brother love team nina Will Ashley at Bianca De Vera. Ayon sa vocalist ng banda na si Gian Bernardino, “kilig much” daw siya nang makita ang edits na ginamitan ng kanilang kanta.

Simula noon, nakakuha na ang “Multo” ng mahigit 60 million Spotify streams, at bahagi na rin ito ngayon ng debut full-length album ng Cup of Joe na Silakbo, na nirelease noong January ngayong taon.

Ang official music video ng “Multo” ay pinagbidahan ng batikang young actors na sina Elijah Canlas at Miles Ocampo, na lalo pang nagpadagdag sa hugot feels ng kanta.

Kilalang-kilala ang Cup of Joe sa kanilang relatable lyrics at catchy melodies. Ilan pa sa mga tumatak nilang kanta ay “Misteryoso,” “Tingin,” “Estranghero,” at “Ikaw Pa Rin Ang Piliin Ko.”

Ngayong nakapasok na sa global charts ang “Multo,” maraming fans at kapwa musicians ang proud sa tagumpay na ito — isang patunay na kaya ng OPM makipagsabayan sa world stage.