2 Mayo 2025 — Isang sorpresa ang hatid sa mga tagahanga ng John Wick matapos ianunsyo ng Lionsgate ang hindi inaasahang paglabas ng bagong pelikulang Wick Is Pain, na ipapalabas nang digital sa Mayo 9, 2025.

Hindi tulad ng mga naunang pelikula, ang Wick Is Pain ay hindi sequel o prequel, kundi isang dokumentaryo na sumusilip sa likod ng paggawa ng iconic action series. Tampok dito sina Keanu Reeves, direktor Chad Stahelski, at mga producer na sina David Leitch at Basil Iwanyk na magbabahagi ng mga karanasan sa pagbuo ng prangkisa mula sa pagiging indie film hanggang sa pagiging global hit.

Ipinangako ng dokumentaryo ang mga eksena at panayam na hindi pa naipapakita, kabilang ang mga pagsubok na kinaharap ng production team—mula sa problemang pinansyal hanggang sa matinding pisikal na hamon sa mga artista at stunt crew. “We say John Wick is pain, and it’s kind of like a ‘f**k yeah,’” ani Reeves sa trailer.

Inihayag ng Lionsgate na muntik nang hindi matuloy ang unang pelikula ng John Wick dahil sa hirap makakuha ng $6 milyon na pondo. Tampok sa dokumentaryo ang emosyonal at pisikal na sakripisyo ng cast at crew para maisagawa ang mga signature fight scenes ng pelikula.

Magkakaroon ng espesyal na screening ang Wick Is Pain sa Beyond Fest sa Los Angeles sa Mayo 8, isang araw bago ang opisyal nitong digital release. Mabibili ito sa mga platform tulad ng Prime Video, Apple TV, YouTube, at Microsoft Movies & TV simula Mayo 9.

Samantala, kinumpirma rin ng Lionsgate na nasa development na ang John Wick 5—kahit pa mistulang namatay na ang karakter ni Keanu Reeves sa Chapter 4. Bukod dito, ang spin-off na Ballerina na pinagbibidahan ni Ana de Armas ay nakatakdang ipalabas sa mga sinehan sa Hunyo 6, 2025.