HULYO 7, 2025 — Pinaghahanap ng mga pulis sa Toronto ang isang 43-anyos na Filipina na akusado sa panloloko sa maraming biktima gamit ang pekeng immigration services. Nahaharap sa mga kasong fraud, false pretense, at paggamit ng pekeng dokumento si Maria Corpuz matapos umanong lokohin ang mga kliyente at nakakuha ng libu-libong dolyar. 

Ayon sa imbestigador, nag-operate si Corpuz malapit sa Yonge Street at Eglinton Avenue, at nag-aalok ng pagproseso ng citizenship applications at work permits kapalit ng bayad. Nagbayad ang mga biktima para sa akala nilang lehitimong serbisyo, para lang malaman na peke ang mga dokumentong ibinigay niya. Sila’y nanatiling walang legal na status sa Canada. 

Pinaghihinalaang may mas marami pang nabiktima si Corpuz, kaya hinihimok ang iba na magsalita. Walang nakakaalam kung nasaan ang Pinay ngayon, kaya inilabas ng pulisya ang kanyang larawan at humihingi ng tips sa publiko. Kahit maliliit na detalye ay maaaring makatulong para mahuli siya. Pinapayuhan din siyang sumuko ng kusa. 

Lumalaki ang problema ng immigration fraud sa Canada, kung saan madalas target ang mga vulnerable na indibidwal. Pinapaalalahanan ang publiko na i-verify muna ang credentials ng mga consultants sa mga opisyal na channels bago kunin ang kanilang serbisyo. 

Kung sino man ang may impormasyon ay maaaring tumawag sa Toronto Police sa 416-808-3100 o sa Crime Stoppers nang anonymous sa 416-222-TIPS (8477). 

(Larawan: Toronto Police)