MANILA — Isang government employee mula sa Caloocan City ang pormal na nagsampa ng reklamo laban sa popular na Facebook meme page na Follow The Trend Movement (FTTM) matapos umano siyang gawing paksa ng isang mapanirang post.

Ayon sa salaysay ng complainant, na empleyado ng Caloocan City Assessment Department at isang person with disability (PWD), ginamit ang kanyang larawan habang nagmamaneho ng all-terrain vehicle (ATV) at nilagyan ito ng caption na “LEAKED: GTA VI Caloocan City.” Giit niya, nakasira ito sa kanyang reputasyon at pagkatao.

Sinubukan niyang makipag-ugnayan sa FTTM upang maalis ang post, ngunit nakatanggap lamang siya ng automated reply. Tinanggal naman ang naturang meme sa page makalipas ang isang araw, ngunit ayon sa kanya, sapat na ang oras na iyon para makilala siya ng ilang tao kahit hindi malinaw na nakikita ang kanyang mukha.

Sa inihaing reklamo, idinawit niya sina Mark Anicas (Media Director), Erika Antuerfia (Partnerships Lead), at Jane Grafane (Content Executive) ng FTTM. Ang mga kasong isinampa ay kinabibilangan ng cyber libel sa ilalim ng Republic Act No. 10175 (Cybercrime Prevention Act), paglabag sa Republic Act No. 7277 (Magna Carta for PWDs), at unjust vexation sa ilalim ng Article 287 ng Revised Penal Code.

Binanggit din ng complainant na ang ganitong uri ng online content ay hindi lamang simpleng biro, kundi may epekto sa dignidad ng tao, lalo na sa mga PWD. Sa kasalukuyan, lumalakas ang diskusyon sa bansa hinggil sa mga SLAPP o Strategic Lawsuit Against Public Participation, kung saan ginagamit umano ang mga kaso upang patahimikin ang malayang pagpapahayag.