MANILA — Emosyonal na ibinahagi ni Kristel Fulgar ang kanyang karanasan sa unang pagkakataon na LDR sila ng kanyang asawang si Ha Su-hyuk, isang negosyanteng Koreano, matapos silang ikasal noong Mayo. Sa kanyang pinakabagong vlog sa YouTube, inilarawan ng aktres at content creator ang pagbabalik niya sa Pilipinas bilang ang “pinakamalungkot” sa lahat ng kanyang pag-uwi.

“I’m back in the Philippines, my home country. Ito na siguro ’yung pinakamalungkot kong balik dito sa Pilipinas,” ani Kristel. Ayon sa kanya, dati ay laging may kasamang tuwa ang pag-uwi dahil sa muli niyang makikita ang kanyang mga alagang aso at ang pamilyar na paligid. Ngunit ngayong pagkakataon, napagtanto niyang iba na ang kanyang pananaw—“My home is where my husband is,” dagdag niya, na nagpapakita ng lalim ng kanilang ugnayan.

Ibinahagi rin ni Kristel na mas malungkot pa ang kanyang asawa sa kanilang sitwasyon. “Actually, sabi niya sa akin sobrang malulungkot siya kasi at least daw ako dito meron akong dogs, nandito si Mama. Eh siya daw pag-uwi niya ng work, mag-isa lang siya. Nakakalungkot nga naman 'yun," kuwento niya.

Ang dahilan ng kanyang pagbabalik sa Pilipinas ay hindi lamang personal kundi praktikal din. Ipinaliwanag niya na kailangan niyang asikasuhin ang mga dokumento para sa F6 spouse visa, na kinakailangan para makapirmi siya sa South Korea bilang asawa. “Sa ngayon kasi naka-tourist visa pa lang ako. Wala pa akong F6 visa, which is spouse visa, and hindi rin ganun kadali makakuha ng ganun. Maraming requirements na dito ko lang pwedeng gawin, dito sa Pilipinas. Kaya itong uwi ko ngayon, isa 'yun sa mga agenda ko,” paliwanag niya.

Sa kabila ng lungkot at hirap ng long-distance relationship, nananatiling positibo si Kristel. Nakatuon siya ngayon sa mabilis na pagproseso ng kanyang visa upang agad siyang makabalik sa piling ng asawa.

Si Kristel Aina Oquindo Fulgar ay kilala sa mga teleseryeng tulad ng Goin’ Bulilit, Maria Flordeluna, Dahil Sa Pag-ibig, Got to Believe, at Bagito. Bukod sa pagiging aktres at singer, isa rin siyang matagumpay na vlogger sa YouTube na patuloy na sinusubaybayan ng kanyang mga tagahanga. (Larawan: Kristel Fulgar / Fb)