OKTUBRE 14, 2025 — Sa kauna-unahang pagkakataon, magiging pangunahing tampok ang Pilipinas sa Frankfurt Book Fair ngayong Oktubre 15–19, 2025, bilang Guest of Honour sa ika-77 edisyon ng prestihiyosong pandaigdigang pagtitipon ng mga aklat.

Matapos ang halos isang dekadang paghahanda, nakamit ng bansa ang bihirang pagkilalang ito sa tulong ng masinsinang koordinasyon sa pagitan ng National Commission for Culture and the Arts (NCCA), National Book Development Board (NBDB), Department of Foreign Affairs (DFA), at ng matagal nang adbokasiya ni Senador Loren Legarda.

Simula pa noong 2015, isinulong na ni Legarda ang partisipasyon ng Pilipinas sa Frankfurt Book Fair, kabilang ang pagbuo ng delegasyon, pakikipag-ugnayan sa mga ahensya, at pagtulak sa tinatawag niyang “literary diplomacy.”

Ang sentro ng presensya ng bansa sa fair ay ang Philippine Pavilion — isang 2,000-square-meter na espasyo na idinisenyo ni Stanley Ruiz gamit ang kapis, piña, at kawayan. Pabilog ang layout ng pavilion, simbolo ng pagkakaugnay ng mga isla ng Pilipinas.

May temang “The imagination peoples the air,” hango sa nobelang Noli Me Tangere ni Jose Rizal na unang inilimbag sa Alemanya noong 1887, layunin ng pavilion na ipakita ang literatura ng bansa bilang salamin ng pagkakakilanlan.

“The imagination peoples the air, and we are ready to breathe new life into the world's understanding of what Philippine literature means. Ours is not just beautiful stories, but essential ones that the world needs to hear, engage with, understand, and appreciate,” ani Legarda. 

(Ang imahinasyon ay pumupuno sa hangin, at handa na tayong bigyang-buhay ang bagong pag-unawa ng mundo sa kahulugan ng panitikang Pilipino. Hindi lang ito magagandang kuwento, kundi mahahalagang salaysay na kailangang marinig, pagnilayan, unawain, at pahalagahan ng mundo.)

Ang pavilion ay hahatiin sa anim na temang magpapakilala sa iba’t ibang mukha ng kulturang Pilipino: That You May Know Us, What Moves Us, While We Are Away, What Bewitches Us, What We Imagine, at What We Keep and Remember.

Bukod sa pavilion, tampok din ang Philippine National Stand na maglalaman ng libu-libong aklat para sa international rights sales. Sa Rossmarkt Square, isang jeepney ang gagamitin bilang mobile stage para sa mga workshop at palitan ng kaalaman.

Magkakaroon din ng mga pagtatanghal, eksibit, at screening ng pelikula sa iba’t ibang bahagi ng Frankfurt bilang bahagi ng cultural showcase ng bansa.

Si Legarda ang magbibigay ng keynote address sa pagbubukas ng fair, bilang kinikilalang utak sa likod ng pagkakapili ng Pilipinas bilang Guest of Honour.

Sa Frankfurt Book Fair, hindi lamang panitikan ang dala ng Pilipinas kundi ang buo nitong diwa, malikhaing lakas, at kakayahang baguhin ang pananaw ng mundo sa kung sino tayo.

(Larawan: Philippine Information Agency)