April 8, 2025 — Simula ngayong Abril, maglulunsad ang gobyerno ng mas maraming Kadiwa stores sa mga housing site ng National Housing Authority (NHA), kung saan makakabili ang mga benepisyaryo ng bigas sa halagang P33 kada kilo, ayon kay NHA General Manager Joeben Tai nitong Lunes.

Sa isang media forum, sinabi ni Tai na sabay-sabay na magbubukas ang mga Kadiwa outlets mula Abril hanggang Mayo 2025 sa piling lugar sa Central Luzon at Region IV. Kasama sa mga target na lokasyon ang San Jose del Monte sa Bulacan, ilang bahagi ng Laguna, Naic at Bacoor sa Cavite, at ilang bayan sa Rizal.

Ang Kadiwa ng Pangulo program ay layuning dalhin ang abot-kayang mga produktong agrikultural—tulad ng bigas, gulay, karne, at isda—sa mas maraming Pilipino, lalo na sa mga nangangailangan. Pormal na nilagdaan ng NHA at Department of Agriculture (DA) ang kasunduan noong Marso para sa programang ito.

Sa ilalim ng pinalawak na programa, maaaring bumili ang bawat pamilya sa mga NHA housing sites ng bigas sa halagang P33 kada kilo, mula tatlo hanggang 50 kilo o isang sako kada transaksyon.

Ayon kay Tai, ang proyekto ay inaasahang makakapagserbisyo sa humigit-kumulang 1.2 million housing beneficiaries sa buong bansa. Habang nagpapatuloy pa ang procurement process, may paunang alokasyon na ng 80,000 sako ng bigas.

“Hopefully, this week or next week, ma-deliver na sa amin sa housing sites yung mga bigas,” ani Tai, na nagpahayag ng kumpiyansa sa agarang distribusyon ng suplay.

Bahagi ito ng patuloy na hakbang ng gobyerno para tugunan ang food insecurity at inflation, sa pamamagitan ng pagbibigay ng access sa mga pangunahing bilihin sa mas abot-kayang presyo para sa mga low-income na pamilya.