HULYO 6, 2025 — Naglatag si Senator Sherwin Gatchalian noong Linggo ng panukalang batas na naglalayong gawing tatlong taon na lang ang kolehiyo para mabawasan ang financial burden ng mga magulang. Sa ilalim ng Three-Year College Education Act, maaaring paikliin ng Commission on Higher Education (CHED) ang mga degree program, kung saan mababawasan ang gastos sa tuition, dorm, at iba pang bayarin sa paaralan.

Binigyang-diin ni Gatchalian, “Hindi natin ito ginawa para magtipid ang gobyerno. Ginawa natin ito para makapag-tipid ang mga magulang.”

Dahil dito, maiiwasan na ang pag-uulit ng mga subject na natapos na sa basic education. Halimbawa, ang physical education (PE), na kinuha na noong grade school pa lamang, ay kinakailangan pa ring kunin sa kolehiyo — kaya napipilitan ang mga magulang na magbayad ng apat pang semestre.

Sa ilalim ng panukala, matatapos na ang general education subjects sa senior high school, kaya mas magkakaroon ng oras ang mga estudyante sa core subjects at internship. Ayon kay Gatchalian, mas magiging handa ang mga graduate para sa trabaho habang nababawasan ang paulit-ulit na coursework.

Kung maipapasa, mababago nito ang higher education sa Pilipinas — mas mura, mas epektibo, at mas handa ang mga graduate sa trabaho. 

(Larawan: Philippine Information Agency)