HULYO 27, 2025 — Nagbabala ang Department of Health (DOH) sa publiko laban sa pag-inom ng antibiotic na doxycycline nang walang pahintulot ng doktor, lalo na sa gitna ng pagdami ng leptospirosis dahil sa baha.

Ayon sa DOH, bagaman ginagamit ang doxycycline para sa leptospirosis, ang paggamit nang hindi wasto ay maaaring magdulot ng antibiotic resistance at magpalala ng impeksyon.

“Kapag mali ang pag-inom, pwedeng mawalan ito ng bisa laban sa mga mikrobyo at maging mas mahirap gamutin ang simpleng impeksyon,” giit ng ahensya. “Pwede itong humantong sa matagal o mas matinding pagkakasakit.”

Dapat naireseta lamang ito batay sa tiyak na panganib ng exposure sa baha.

Para makaiwas sa leptospirosis, payo ng DOH:

• Iwasang lumusong sa baha. Kung kailangan, mag-boots at proteksyon.

• Hugasan agad ang mga paa at sugat gamit ang malinis na tubig at sabon.

• Panatilihing malakas ang resistensya sa pamamagitan ng balanced diet.

Umaapela rin ang DOH sa mga lokal na pamahalaan na magbigay ng libreng prophylaxis sa mga high-risk individuals, lalo na sa heavily flooded areas.

Sa kasalukuyan, nakapagtala na ng 17 confirmed cases ng leptospirosis ang East Avenue Medical Center, habang inaasahang tataas pa ang bilang. Nagpaalala ang DOH na agad magpakonsulta sa doktor kapag nakaranas ng lagnat, pananakit ng katawan, o pamumula ng mata — mga sintomas ng leptospirosis.

Dagdag pa ng ahensya, huwag mag-antay hanggang sa maging malala ang kondisyon. Bantayan ang kalusugan, at laging sumangguni sa eksperto.

Patuloy ang monitoring ng DOH sa mga ospital para matugunan ang posibleng pagdami ng kaso.

(Larawan: Philippine News Agency)