MANILA — Ipinag-utos ni Department of Transportation (DOTr) Secretary Vince Dizon ang habambuhay na pagkansela ng lisensya ng isang driver na nahuling nag-counterflow sa Skyway nitong Sabado ng madaling-araw, Agosto 9.

Batay sa ulat ng DOTr, bandang 3:32 a.m., nakita sa CCTV footage ang nasabing motorista na nag-o-overtake sa opposite lane ng Skyway Northbound, na nagdulot ng panganib sa mga kasalubong na sasakyan.

Ayon kay Dizon, hindi sapat na suspindihin lamang ang lisensya ng driver dahil malinaw sa video na nalagay sa peligro ang buhay ng ibang motorista. “I have ordered that the driver’s license of this reckless driver be revoked so that his reckless driving will not be repeated,” aniya.

Hinikayat din ng DOTr chief ang publiko na patuloy na mag-ulat ng ganitong klase ng paglabag upang agad na makagawa ng aksyon ang ahensya.