OKTUBRE 1, 2025 — Itinanggi ni Senate President Pro Tempore Panfilo Lacson ang anumang ugnayan sa pamilya Discaya matapos kumalat sa social media ang isang larawan na kuha umano sa isang pribadong pulong.

Ang nasabing larawan ay ipinost ni Cavite 4th District Rep. Kiko Barzaga sa Facebook, kalakip ang panawagang imbestigahan ang “validity” ng larawan ni Lacson kasama ang mga Discaya, kabilang ang mag-asawang Curlee at Sara Discaya na sangkot sa iniimbestigahang flood control scam.

Ayon kay Lacson, ang larawan ay kuha noong huling linggo ng Abril, ilang araw bago matapos ang kampanya para sa midterm elections. Dinala sa kanyang opisina sa Taguig ng campaign supporter mula Davao na si Fred Villaroman ang anak ng mga Discaya, na nominado ng party-list na Ako Pinoy.

Ani Lacson, inimbitahan siya ng nominado sa isang “grand rally” sa Davao, ngunit agad niya itong tinanggihan. Dalawang dahilan ang kanyang binanggit: una, bilang respeto sa kaibigang si Senate President Tito Sotto, na tiyuhin ni Pasig Mayor Vico Sotto — katunggali ni Sara Discaya sa halalan; ikalawa, dahil may ibang party-list groups na ginagamit ang kanyang pangalan sa sample ballots.

“I did not know the Discayas and that was the first and only time outside of the Blue Ribbon committee hearings that I met them,” pahayag ni Lacson. 

(Hindi ko kilala ang mga Discaya at iyon ang una at tanging pagkakataon na nakaharap ko sila, bukod sa mga pagdinig ng Blue Ribbon committee.)

Nilinaw rin niyang tumagal lamang ng 15 hanggang 20 minuto ang naturang pulong, na nagtapos sa isang group photo.

“I hope this clarifies whatever insinuations are being attached to this said photograph,” dagdag pa niya. 

(Sana ay malinawan ang anumang paratang na ikinakabit sa larawang ito.)

Sa kasalukuyan, iniimbestigahan ng Blue Ribbon Committee na pinamumunuan ni Lacson ang umano’y multi-bilyong pisong anomalya sa flood control projects kung saan nasasangkot ang mag-asawang Discaya.

(Larawan: Congressman Kiko Barzaga | Facebook)