OKTUBRE 6, 2025 — Mariing tinutulan ng ilang senador ang panukala ni Senate Minority Leader Alan Peter Cayetano na magsagawa ng sabayang pagbitiw ng lahat ng halal na opisyal upang magdaos ng snap elections, sa gitna ng mga kontrobersiyang kinakaharap ng gobyerno.

Sa isang pahayag noong Oktubre 5, iginiit ni Cayetano na ang sunod-sunod na alegasyon ng katiwalian sa mga proyekto ng flood control ay sumira sa tiwala ng taumbayan sa pamahalaan. 

Aniya, “If we are really serious about restoring trust, then let’s go all in. Let everyone resign — from the President down to the last congressman — and let’s hold snap elections.” 

(Kung seryoso tayong ibalik ang tiwala, magkaisa tayong lahat na magbitiw — mula sa Pangulo hanggang sa huling kongresista — at magsagawa ng snap elections.)

Dagdag pa niya, “But here’s the catch. None of us who are in office now should be allowed to run again.” 

(Ngunit may kondisyon. Wala ni isa sa atin na nasa puwesto ngayon ang dapat payagang tumakbo muli.)

Ngunit para kay Senate President Vicente “Tito” Sotto, walang legal na batayan ang mungkahi. 

“We have no constitutional nor legal framework for snap elections. We will be flirting with uncertainty and chaos,” babala niya. 

(Walang probisyon sa Konstitusyon para sa snap elections. Para tayong nakikipaglaro sa kaguluhan at kawalang-katiyakan.)

Sinang-ayunan ito ni Senate President Pro Tempore Panfilo “Ping” Lacson, na iginiit na hindi halalan ang solusyon sa pagbawi ng tiwala ng publiko. 

“Election, snap or regular, is not the solution. In fact, election campaigns actually add to more corruption — of the electorate by the candidates,” paliwanag niya. 

(Hindi halalan, snap man o regular, ang solusyon. Sa katunayan, lalo lang itong nagpapalala ng katiwalian — sa mga botante mismo, dulot ng mga kandidato.)

Para kay Lacson, ang mas epektibong hakbang ay ang agarang pagpaparusa sa mga tiwaling opisyal. 

“For a change, how about certainty of punishment of corrupt politicians? The higher the better,” aniya. 

(Para sa pagbabago, paano kung tiyakin natin ang parusa sa mga tiwaling pulitiko? Mas mataas, mas mabuti.)

Matapos umani ng batikos, nilinaw ni Cayetano na hindi niya intensyong pilitin ang sinuman na magbitiw. 

“It’s not my job nor my intention to tell anyone what to do, to tell anyone to resign ... My duty is to reflect on the problems our nation faces — discern, pray, then articulate ideas,” paliwanag niya. 

(Hindi ko trabaho o layunin na utusan ang sinuman na magbitiw ... Tungkulin kong pagnilayan ang mga suliranin ng bansa — magnilay, manalangin, at maglahad ng mga ideya.)

May ilan naman ang nagsabing kung talagang seryoso si Cayetano sa panawagan ng sabayang pagbitiw, siya ang dapat na unang magpakita ng halimbawa sa pamamagitan ng sariling pagbibitiw — baka sakaling may sumunod.

Sa kabila ng panawagan, nananatiling hati ang opinyon ng publiko at mga mambabatas sa mungkahing ito.

(Larawan: Senate of the Philippines | Facebook)