DAVAO DE ORO — Isang pitong taong gulang na batang lalaki ang nasawi matapos ilang beses na tuklawin ng makamandag na cobra, lokal na kilala bilang banakon, sa Barangay Malinawon, Mawab, Davao de Oro noong Oktubre 9, ayon sa ulat ng Mawab Municipal Disaster Risk Reduction and Management Office (MDRRMO).

Kinilala ang biktima na si Wilsy James Relampagos, residente ng Sitio Libertad, na sinamahan ang kanyang ina sa sakahan bandang alas-2:00 ng hapon. Habang nasa bukid, napalayo umano ang bata at doon siya tinuklaw ng ahas sa braso, kamay, at binti. Nakatakbo pa siya pabalik sa kanyang ina at nagbabala: “Huwag kang lalapit doon, may ahas!” ayon sa salaysay ng ina sa GMA Super Radyo Davao.

Agad rumesponde ang mga rescuer at isinugod ang bata sa Minglanilla District Hospital, ngunit idinaklarang dead-on-arrival dahil sa matinding epekto ng kamandag at dami ng kagat.

Nagpaabot ng pakikiramay ang MDRRMO sa pamilya ng biktima at nagpaalala sa mga residente, lalo na sa mga naninirahan sa rural at forested areas, na magsuot ng makakapal na pantalon at bota kapag pupunta sa bukid upang maiwasan ang insidente ng tuklaw.

Ang insidente ay muling nagbigay-diin sa pangangailangan ng access sa anti-venom sa mga probinsya, pati na rin ang mas malawak na edukasyon sa pag-iwas sa wildlife hazards sa mga komunidad.