MANILA — Iginiit ng Bureau of Immigration (BI) na mahalagang maipasa ang panukalang batas na magmo-modernisa sa 85-taong Philippine Immigration Act upang mapalakas ang seguridad sa mga hangganan ng bansa.

Sa isang pahayag, nagpasalamat si BI Commissioner Joel Anthony Viado kay Pangulong Ferdinand Marcos Jr. at sa mga mambabatas sa pagsama ng BI Modernization Bill sa 44 na prayoridad na panukala sa ilalim ng Common Legislative Agenda ng ika-20 Kongreso. “We deeply appreciate the support of many lawmakers who recognize the importance of updating our 85-year-old immigration law. Their acknowledgment of this urgent need is a major step forward in modernizing the BI,” ani Viado.

Ang desisyon ay ginawa sa pulong ng Legislative-Executive Development Advisory Council noong Setyembre 30, kung saan binigyang-diin ang pangangailangan ng mas episyenteng immigration procedures, mas matatag na border security, at mas maayos na pamamahala sa mga polisiya ng ahensya.

Ayon sa BI, ang kasalukuyang Immigration Act na ipinatupad pa noong 1940 ay hindi na angkop sa kasalukuyang hamon ng global migration, teknolohiya, at seguridad. Sa ilalim ng bagong batas, inaasahang magkakaroon ng mas mabilis na proseso sa pagpasok at paglabas ng mga dayuhan, pati na rin ang mas mahigpit na screening sa mga posibleng banta sa pambansang seguridad.

Ang panukala ay bahagi ng mas malawak na reporma sa ahensya, kasabay ng pag-upo ni Viado bilang bagong BI Commissioner noong Setyembre. “We are committed to transforming the Bureau into a modern, responsive, and secure immigration agency,” dagdag pa niya.