DASMARIÑAS, Cavite — Sa isang makulay at kakaibang paraan, ibinahagi ni Cavite 4th District Representative Francisco “Kiko” Barzaga ang kanyang Statement of Assets, Liabilities, and Net Worth (SALN) sa publiko — gamit ang Facebook post na may cat avatar.

Kilalang “Congressmeow” sa social media, in-upload ni Barzaga ang larawan ng kanyang SALN nitong Martes ng hapon, Oktubre 21. Makikita sa pangunahing post ang dalawang pahinang dokumento na hawak ng isang puting pusa, habang inilagay naman niya ang malilinis na kopya sa comment section.

Batay sa dokumento, si Barzaga, 27, ay may net worth na P5.375 milyon, na nagmula sa kanyang deklaradong “cash” at “cash from monthly income”. Nilinaw niya sa post na hindi pa kasama rito ang mga hindi pa naililipat na minanang ari-arian mula sa kanyang ama, ang yumaong Congressman Elpidio “Pidi” Barzaga. “Not including untransferred, inherited assets from the late Congressman Pidi Barzaga: Vehicles, Dasmariñas Property, and Cash amounting to an estimated total of 35 Million PHP,” ani Barzaga.

Ipinahayag din niya ang pagmamay-ari ng dalawang sasakyan — isang Toyota Camry at isang Toyota Hiace Super Grandia — ngunit hindi ito isinama sa net worth dahil idineklara niyang mga “donations” noong 2019.

Wala siyang idineklarang real properties o anumang liabilities.

Sa bahagi ng “Relatives In The Government Service” ng kanyang SALN, binanggit ni Barzaga ang apat na kamag-anak na pawang mga opisyal sa Cavite:

• Dasmariñas City Mayor Jenny Barzaga (ina)
• Dasmariñas City Vice Mayor Elpidio Barzaga III (kapatid)
• Dasmariñas City Senior Administrative Assistant III Jocelyn Austria (tiya)
• Provincial Board Member Nickanor Austria Jr. (tiyuhin)

Larawan mula kay Kiko Barzaga