DISYEMBRE 17, 2025 — Magsisimula ngayong Disyembre 24 ang matagal nang inaabangang rehabilitasyon ng EDSA, na ayon sa Department of Public Works and Highways (DPWH) ay matatapos sa loob lamang ng walong buwan. Ang bagong scheme ay malaking pagbabago mula sa dating dalawang taong plano, na layong bawasan ang abala sa mga motorista.

Inihayag ni DPWH Secretary Vince Dizon sa isang press conference kasama ang Metropolitan Manila Development Authority (MMDA) at Department of Transportation na gagamitin ng ahensya ang dalawang linggong holiday break para simulan ang malalaking gawain sa kalsada.

“December 24, 11 p.m. to January 5, 4 a.m., we will be working 24/7 on Edsa during the Christmas and New Year holiday. As Chairman Don said, not many people will use Edsa during this time. Even passengers on the busway — they are not that many. So we will take advantage of that,” ani Dizon. 

(Disyembre 24, alas-11 ng gabi hanggang Enero 5, alas-4 ng madaling araw, magtatrabaho kami nang tuluy-tuloy sa EDSA sa panahon ng Pasko at Bagong Taon. Gaya ng sinabi ni Chairman Don, kakaunti ang gagamit ng EDSA sa panahong ito. Maging ang mga pasahero sa busway — hindi ganoon karami. Kaya namin gagamitin itong pagkakataon na ito.)

Hahatiin sa dalawang yugto ang proyekto. Ang unang apat na buwan ay tututok sa bahagi mula Roxas Boulevard hanggang Orense, habang ang natitirang apat na buwan ay para sa kabuuan ng EDSA. 

Target ng DPWH na matapos ang lahat ng reblocking at asphalt overlay sa busway lanes bago bumalik ang regular na trapiko matapos ang holiday.

Mula sa dating P17 bilyong budget, bumaba sa P6 bilyon ang halaga ng proyekto dahil sa pagbabago ng pamamaraan. Sa halip na buong reblocking, mga piling seksyon lamang ang aayusin at gagamit ng stone mastic asphalt (SMA), isang mas matibay at mas mabilis ilatag na materyales. Ayon kay Dizon, ang bagong teknolohiya ay magbibigay ng mas maayos na kalidad ng kalsada nang hindi inaabot ng matagal.

Narito ang schedule ng konstruksyon:

• Disyembre 24, 2025 – Enero 5, 2026: 24 oras na trabaho araw-araw para sa reblocking at overlay ng busway lanes.
• Pagkatapos ng Enero 5: Gagawin ang mga gawain tuwing gabi mula 10 p.m. hanggang 4 a.m., at muling bubuksan ang mga apektadong bahagi pagsapit ng 5 a.m. upang magamit ng mga motorista.

Inaasahan ng DPWH at MMDA na mas kaunti ang epekto sa daloy ng trapiko kumpara sa dating plano. Maglalabas ng mga abiso at traffic management measures bago ang implementasyon upang gabayan ang publiko.

(Larawan: Philippine News Agency)