Manila, Philippines- March 14, 2025- Muling nagkakansela ng klase sa maraming lugar sa Pilipinas dahil sa matinding init. Bagama’t ginagawa ito para protektahan ang mga estudyante at guro mula sa heat-related illnesses, ipinapakita rin nito ang mas malaking problema—hindi handa ang ating mga paaralan at komunidad sa patuloy na pagtaas ng temperatura. Hindi na lang ito simpleng abala, kundi isang seryosong krisis na nangangailangan ng agarang at pangmatagalang solusyon.

Taon-taon, nagdurusa ang mga estudyante sa matinding init sa loob ng mga silid-aralan na kulang sa bentilasyon at maayos na cooling system. Nahihirapan silang mag-aral, bumababa ang kanilang konsentrasyon, at lumalaki ang panganib sa kanilang kalusugan. Kapag umabot sa mapanganib na antas ang heat index, napipilitang suspindihin ang klase. Pero pansamantala lang ito. Ang tanong: Paano natin maiiwasan na mangyari ito nang paulit-ulit? Paano natin masisigurong magpapatuloy ang pag-aaral ng mga estudyante kahit sa gitna ng matinding init?

Isa sa mga pangunahing dahilan ng matinding init ay ang climate change. Palala nang palala ang init sa buong mundo, at dahil tropical country ang Pilipinas, mas madalas at mas matindi nating nararanasan ito. Sa kabila ng ebidensya at paulit-ulit na babala ng mga eksperto, mabagal at reactive pa rin ang tugon ng gobyerno. Hindi sapat ang puro pangakong aksyon sa climate change. Kailangan ng konkretong hakbang—mas mahigpit na environmental laws, bawasan ang paggamit ng fossil fuels, mas maayos na waste management, at mas maraming renewable energy sources. Dapat ding kumilos ang mga lokal na pamahalaan sa pamamagitan ng tree-planting initiatives at urban planning na makakatulong sa pagpapababa ng temperatura sa mga komunidad.

Isa pang malaking problema ang kakulangan sa maayos na imprastraktura ng mga paaralan. Maraming pampublikong paaralan, lalo na sa mga probinsya, ay siksikan at may bubong na yero na lalong nagpapainit sa silid-aralan. Marami rin ang walang maayos na bentilasyon kaya lalo itong nagiging hindi komportable tuwing tag-init. Kailangan ng Department of Education na gumawa ng mga climate-resilient school buildings, gumamit ng heat-resistant roofing, at magbigay ng sustainable cooling solutions tulad ng solar-powered fans. Hindi sapat ang basta paglalagay ng electric fans kung madalas naman ang brownout at mataas ang singil sa kuryente.

Ang madalas na pagkansela ng klase dahil sa init ay nakakaapekto rin sa academic calendar. Bumaba ang oras ng pag-aaral at naapektuhan ang performance ng mga estudyante. Dapat pag-aralan ng gobyerno at mga paaralan ang iba pang alternatibong paraan tulad ng blended learning, pagbabago sa oras ng klase, o kaya ay paglipat ng school break sa pinakamainit na buwan. Kung may flexible work arrangements para sa mga empleyado tuwing matindi ang init, bakit hindi ito magawa para sa mga estudyante?

Hindi dapat tinatanggap na normal lang ang paulit-ulit na class suspensions dahil sa init. Isa itong babala na dapat nang magkaroon ng seryosong aksyon sa climate change, mas maayos na imprastraktura, at isang mas flexible na sistema ng edukasyon. Kung patuloy na walang gagawin ang gobyerno, ang mga susunod na henerasyon ang higit na magdurusa—hindi lang sa init kundi sa mga epekto ng kakulangan sa maayos na pagpaplano at aksyon.

Hindi titigil ang init, pero dapat tayong kumilos. Panahon na para sa totoong solusyon, hindi lang pansamantalang sagot.

Larawan mula sa DepEd