MANILA — Mula sa pagiging kilalang vlogger at content creator, opisyal nang pumasok sa mundo ng musika si Mika Salamanca sa ilalim ng Star Music matapos ilabas ang kanyang debut single na “Sino Nga Ba Siya”.

Ang kanta, na orihinal na inawit ni Sarah Geronimo, ay isang makabagbag-damdaming ballad na muling binigyang-buhay ni Mika. Mabilis nitong naabot ang #1 spot sa iTunes Philippines ilang oras matapos ang release, patunay ng mainit na pagtanggap ng publiko.

Bago pa man ang opisyal na paglulunsad, naging usap-usapan na ang kanta matapos muling mag-viral sa social media ang mga lumang video ni Mika noong bata pa siya na kinakanta ang “Sino Nga Ba Siya.” Ayon sa kanya, malapit sa puso niya ang awitin at matagal na niyang pangarap na maibahagi ito sa mas malaking audience.

Maliban sa kanyang bagong single, kilala na rin si Mika sa mga naunang independent releases tulad ng YOU (2021), shut up (2020), at 3 Am Song (2018). Ngunit itinuturing niya ang “Sino Nga Ba Siya” bilang isang mahalagang milestone sa kanyang career dahil ito ang unang proyekto niya sa ilalim ng isang major record label.

Mapapakinggan na ang “Sino Nga Ba Siya” sa iba’t ibang digital music platforms gaya ng Spotify, Apple Music, at YouTube. Sa kanyang social media, nagpasalamat si Mika sa lahat ng sumuporta at nagpaabot ng pagbati, at nangakong marami pa siyang ilalabas na musika sa mga susunod na buwan.