ARGENTINA — Isang off-duty na pulis sa Argentina ang ginawaran ng $12,500 (mahigit ₱700,000) na danyos matapos siyang makuhanan ng hubad ng Google Street View habang nasa loob ng kanyang bakuran — isang malinaw na paglabag sa kanyang karapatang pantao, ayon sa korte.

Ayon sa ulat ng Agence France-Presse, nakuhanan ang lalaki ng larawan noong 2017 habang nasa loob ng kanyang bahay sa isang maliit na bayan sa Argentina. Habang siya’y nasa natural na ayos sa kanyang sariling bakuran, kinunan siya ng litrato ng dumadaang Google Street View vehicle — sa kabila ng pagkakaroon ng pader na may taas na anim at kalahating talampakan (taller than the average person).

Idiniin ng hindi pinangalanang pulis na hindi lang ang kanyang hubad na katawan ang naipakita — kundi pati ang numero ng kanyang bahay at pangalan ng kalye, na naging dahilan ng kanyang kahihiyan sa komunidad, pati sa hanay ng kanyang mga katrabaho.

Ang larawan ay agad na kumalat sa social media at kinuha rin ng ilang lokal na media, dahilan upang siya’y malantad sa mata ng publiko.

Noong nakaraang taon, ibinasura ng mas mababang korte ang kanyang kaso, iginiit na kasalanan ng pulis ang paglalakad sa ganoong kondisyon sa kanyang sariling bakuran. 

Ngunit binaliktad ng Court of Appeals ang naunang desisyon. Ayon sa mga hukom, “walang sinuman ang nais na maipakita sa mundo sa ayos na parang bagong silang.” Tinukoy nilang ang lalaki ay malinaw na nasa pribadong espasyo, at walang anumang pahintulot ang Google upang ilantad ang ganoong sensitibong imahe.

“Walang duda na ito ay isang arbitraryong panghihimasok sa pribadong buhay ng isang tao,” ayon sa desisyon ng korte. “Ang paglabag sa privacy ay lantad at malinaw.”

Karaniwan nang binablur ng Google ang mga mukha at plaka ng sasakyan sa kanilang Street View images. Ngunit sa kasong ito, tinukoy ng hukom na:

“Hindi mukha ang nakita, kundi buong hubad na katawan — isang imaheng dapat sana ay naiwasan o na-edit.”

Ang panalo ng pulis na ito ay nagsisilbing babala sa malalaking tech companies gaya ng Google: hindi sapat ang awtomatikong sistema ng pag-blur kung ito'y hindi sapat upang protektahan ang dangal at privacy ng mga tao — lalo na kung ito ay kuha sa loob ng kanilang sariling tahanan.

(News Source: Nypost)

(Larawan: Ai Generated - ChatGPT)