MANILA — Kapuso actress at dating Pinoy Big Brother housemate Shuvee Etrata ay muling naging sentro ng talakayan online matapos niyang tahasang ipahayag ang kanyang paninindigan laban sa premarital sex sa isang vlog episode ni Vice Ganda.

Sa naturang panayam, kasama si Ashley Ortega, ibinahagi ni Shuvee ang kanyang personal na pananaw sa pag-ibig, tiwala, at sekswalidad.

“It’s hard for me to trust, ‘di ba? Pero at the same time, gusto ko din namang magmahal. Kasi non-negotiable ko, meme, ang sex. I don’t support premarital sex,” ani Shuvee.

Tinuligsa rin niya ang ideya ng pakikipagtalik bago ang kasal bilang paraan ng “pag-eenjoy” o “pagtikim” upang matukoy kung sino ang gusto ng isang tao.

“I don’t believe in that kasi bakit ka manggagamit ng ibang tao, ibibigay mo ‘yun, tapos you’re gonna make it easy for them to get you, and then hindi mo naman talaga ‘yun bina-value, and then nabigay mo na,” dagdag niya.

Ayon kay Shuvee, madalas siyang husgahan ng mga lalaki dahil sa kanyang pinagmulan.

“Let’s be real. Sometimes that’s how men view me. They devalue me as a woman because I’m from the province, and they believe they can fool me,” aniya.

Bagama’t naniniwala siya sa karapatan ng bawat isa na pumili ng sariling landas, malinaw ang kanyang paninindigan.

“Kanya-kanya naman tayo. It’s just that nung tinanong ako kung anong stand ko, ‘yun ‘yung stand ko,” paliwanag pa niya.

Sa kabila ng pagiging “NBSB” o “no boyfriend since birth,” inamin ni Shuvee na may mga nanligaw sa kanya, kabilang ang Filipino-American model na si Anthony Constantino.

“Yung pagdadala niya sa akin sa church, ang laking bagay. Kasi minsan, yung Sunday, I would rather just rest. Yung time na mini-make effort niya talaga ako para dalhin doon,” kwento ni Shuvee.

Sa kasalukuyan, lumalabas si Shuvee sa “Encantadia Chronicles: Sang’gre” bilang Veshdita, at nakatakdang gumanap sa bagong teleserye na “Master Cutter” kasama sina Dingdong Dantes at Charlie Fleming.