MANILA — Sa kabila ng kontrobersiyang kinakaharap kaugnay ng flood control projects, nanatiling kalmado si Sarah Discaya matapos siyang gayahin ng komedyanteng si Michael V. sa kanyang bagong karakter na “Ciala Dismaya” sa programang Bubble Gang ng GMA Network.

Ayon sa abogado ni Discaya na si Atty. Cornelio Samaniego III, walang sama ng loob ang kanyang kliyente sa parody ni Bitoy. “Hindi po. Okay lang sa kanya. Alam mo naman si Sir Bitoy, talaga namang idol ko nga ‘yan,” pahayag ni Samaniego sa isang ambush interview noong Setyembre 10.

Dagdag pa niya, nauunawaan ni Discaya na bahagi lamang ito ng trabaho ng komedyante. “Nirerespeto natin si Michael V. Idol natin iyan sa Bubble Gang. Trabaho niya ‘yan. Parang ako, abogado, trabaho ko ito. Si Sir Michael, trabaho niya ‘yun. Doon siya kilala. So, bakit tayo magagalit?” ani Samaniego.

Ang karakter na “Ciala Dismaya” ay hango sa personalidad ni Discaya, na naging sentro ng pambansang usapan matapos siyang ipatawag sa Senate Blue Ribbon Committee kaugnay ng umano’y anomalya sa flood control projects. Sa teaser ng Bubble Gang, makikitang ginagaya ni Bitoy ang istilo ni Discaya—mula sa peach lipstick, salamin, nunal sa ilong, hanggang sa puting coat at payong na hango sa kanyang viral Rolls-Royce na may built-in umbrella.

Bagama’t naging usap-usapan ang parody online, nanindigan ang kampo ni Discaya na hindi sila naapektuhan. Sa halip, nakatuon pa rin sila sa pagsagot sa mga alegasyon laban sa kanya at sa kanyang asawa, si Curlee Discaya, na parehong contractor sa mga flood control projects.

Ang episode ng Bubble Gang na tampok si “Ciala Dismaya” ay nakatakdang ipalabas sa Linggo, Setyembre 14, 6:10 p.m. sa GMA Network.

Sa panahon ng matinding imbestigasyon at pambabatikos, tila napanatili ni Discaya ang kanyang sense of humor—isang paalala na sa gitna ng seryosong usapin, may puwang pa rin para sa komedya at respeto sa sining ng pagpapatawa.

Larawan mula sa Bubble Gang