MANILA — Nagtagumpay si Rochelle Pangilinan sa kanyang kauna-unahang paglahok sa Cinemalaya Philippine Independent Film Festival matapos siyang tanghaling Best Supporting Actress para sa pelikulang Child No. 82 (Anak ni Boy Kana).

Sa kanyang Instagram post, ibinahagi ng Kapuso actress ang kanyang emosyonal na reaksyon sa pagkapanalo: “Still feels surreal… hanggang ngayon, hindi ko pa rin lubos maisip na nangyari talaga ‘to,” ani Rochelle. “Sobrang laki ng puso ko ngayon. I poured my soul into this role, and to be recognized in this way… parang panaginip”.

Ang Child No. 82, na idinirek ni Tim Rone Villanueva, ay isa sa mga pelikulang tumanggap ng tatlong parangal sa Cinemalaya 2025, kabilang ang Audience Choice Award at Best Screenplay.

Sa kanyang acceptance speech, hindi napigilan ni Rochelle ang emosyon: “Totoo ba 'to?! Hindi pa ako ready!” aniya habang tinatanggap ang tropeo. “This isn’t just my win. It’s ours,” dagdag pa niya, sabay pasasalamat sa kanyang pamilya, lalo na sa kanyang asawa na si Arthur Solinap at anak nilang si Shiloh.

Matatandaang si Rochelle ay dating kilala bilang lider ng Sexbomb Girls, ngunit sa mga nakaraang taon ay mas pinili niyang tahakin ang landas ng pag-arte. “Today, I can finally say it with all my heart — I AM AN ACTRESS!” ani pa niya.

Ang Cinemalaya 2025 ay ginanap sa Shangri-La Plaza, Mandaluyong City noong Oktubre 12, kung saan pinarangalan din sina Mylene Dizon bilang Best Actress at Jojit Lorenzo bilang Best Actor para sa Habang Nilalamon ng Hydra ang Kasaysayan.

Larawan mula sa Rochelle Pangilinan FB Page