Mayo 6, 2025 — Maraming bagong ina ang nahihirapan tanggalin ang taba sa tiyan pagkatapos manganak—kahit pa regular ang pag-eehersisyo at pagda-diet, nananatili pa rin ang tinatawag na mum pooch. Dahil dito, naglunsad ang fitness expert na si Patrick Hong ng isang 10-minutong workout na partikular na tumatarget sa matigas na taba sa ibabang bahagi ng tiyan—hindi kailangan ng gym at lalong walang crunches.

Si Hong, na kilala sa kanyang mga matagumpay na fat-loss strategies at body transformations, ay idinisenyo ang workout na ito para sa mga abalang nanay. “Still trying to crunch away your mum pooch? Here’s one 10-minute workout that actually helps flatten your lower belly without the gym, without crunches, and without sacrificing your back. This one’s for the career mums, tired mums, busy mums—aka real women who don’t have time to waste (Ginugugol mo pa rin ang oras mo sa crunches para sa mum pooch mo? Subukan mo ito—isang 10-minute workout na kayang patagin ang lower belly mo kahit wala sa gym, walang crunches, at hindi sumasakit ang likod. Para ito sa mga career moms, pagod na moms, busy moms—kumbaga, para sa mga totoong babaeng walang oras para mag-aksaya),” sabi niya sa isang video sa Instagram.

Hindi kasama sa routine ang crunches, dahil puwede itong makasama sa likod at kadalasang hindi naaabot ang mas malalim na core muscles na tunay na nagpapalakas sa tiyan. Sa halip, may tatlong galaw ito na nakatuon sa core, habang iniingatan ang spine at nagbibigay ng malinaw na resulta.

Unang galaw: Humiga nang nakatalikod, itaas ang mga braso’t binti na tuwid papunta sa kisame, at idiin ang ibabang likod sa sahig. Sabay na ibaba ang kanang braso at kaliwang binti habang nakatutok ang core para hindi umarko ang likod. Ibalik sa simula, tapos gawin sa kabilang side—12 reps lahat. “This targets deep core muscles that will flatten your belly (Ito ang target sa malalim na core muscles para lumiit ang tiyan),” paliwanag ni Hong.

Pangalawa: Tumayo nang tuwid at mag-knee drive o parang tumatakbo sa pwesto nang mabilis sa loob ng 30 segundo. Nakaka-boost ito ng heart rate, nakakatunaw ng calories, at ina-activate ang ibabang abs. Para sa mas mabigat ang timbang o nangangailangan ng mas magaan, may opsyon din. “If you're obese, just do standing marches on the spot (Kung obese ka, puwede mong gawin ang standing march sa halip),” aniya.

Huling galaw: Glute bridge. Humiga nang nakatalikod, tuhod ay nakabaluktot, paa nakalapat sa sahig. Itaas ang balakang habang pinapanatiling engaged ang puwet at abs. Iakyat ang kanang tuhod papunta sa dibdib, sandaling i-hold, ibaba, at ulitin sa kaliwa—10 reps bawat binti. “This helps tighten your core while protecting your lower back. Give that a go (Nakakatulong ito para palakasin ang core nang hindi sinasaktan ang likod. Subukan n’yo),” dagdag ni Hong.

Paalala: Kumonsulta muna sa inyong doktor bago magsimula ng bagong workout routine, lalo na kung postpartum pa lamang.

Larawan: Jonathan Borba/Facebook