MANILA, Philippines — Nagpaalala ang Department of Labor and Employment (DOLE) na maaaring ireklamo ang mga employer na namimilit sa kanilang mga empleyado na sumayaw o lumahok sa mga performance sa kanilang Christmas party kung ito ay labag sa loob ng manggagawa.

Ayon sa DOLE, ang pagsali sa mga aktibidad tulad ng sayawan, kantahan, o anumang uri ng entertainment sa company events ay dapat boluntaryo at hindi maaaring ipilit bilang kondisyon sa trabaho. Hindi rin umano dapat gamiting batayan ang pagtanggi ng isang empleyado sa performance para sa anumang uri ng parusa, diskriminasyon, o negatibong pagtrato sa loob ng opisina.

Binigyang-diin ng ahensya na may karapatan ang mga manggagawa sa dignidad, respeto, at kalayaang pumili, at hindi dapat maapektuhan ang kanilang trabaho, sahod, o performance evaluation dahil lamang sa hindi nila pagsali sa mga aktibidad na hindi naman bahagi ng kanilang job description.

Paalala rin ng DOLE sa mga kumpanya na ang diwa ng Christmas party ay magbigay ng kasiyahan at pagkakaisa, hindi takot o pamimilit. Ang mga employer ay hinihikayat na maging sensitibo sa personal na hangganan, kultura, at paniniwala ng kanilang mga empleyado. Kung may panggigipit o pamimilit, maaaring magsampa ng reklamo ang mga manggagawa sa DOLE Regional Office na may hurisdiksyon sa kanilang lugar upang mabigyan ng kaukulang aksyon ang nasabing usapin. (Larawan: iStock / Google)