Oktubre 24, 2025 – Isang napakasayang balita ang ibinahagi ng Kapuso actress at singer na si Lovi Poe matapos niyang kumpirmahin sa publiko na nanganak na siya sa kanilang unang anak ng asawang si Monty Blencowe.

Sa kanyang Instagram post, ibinandera ni Lovi ang isang napaka-sweet at emotional video kung saan makikita siyang buhat-buhat ang kanyang baby habang marahang isinasayaw ito. Kapansin-pansin ang glow ng bagong ina habang tinatanaw ang kanyang munting anghel.

Sa caption, buong puso niyang isinulat, “The moment I met you, instinct took over. Welcome to the world, my love.”

Isang simpleng mensahe, pero ramdam na ramdam ang pagmamahal at emosyon ni Lovi bilang bagong ina.

Agad namang umani ng samu’t saring reaksyon ang post ng aktres. Ilan sa mga kapwa artista, kaibigan, at fans ang nagpaabot ng pagbati at kasiyahan para sa mag-asawa. Marami ang napa-“omg!” at “congratulations!” dahil hindi inaasahan ng karamihan na nanganak na pala si Lovi, lalo na’t tahimik at pribado nilang hinarap ang mga huling buwan ng kanyang pagbubuntis.

Hanggang sa ngayon, wala pang ibinabahagi ang mag-asawa tungkol sa pangalan, kasarian, o iba pang detalye ng kanilang baby, at tila nais muna nilang namnamin ang kanilang precious family time bilang bagong magulang.

Matatandaang noong Setyembre, unang inanunsyo ni Lovi ang kanyang pagbubuntis sa pamamagitan ng isang bonggang maternity campaign para sa isang local clothing brand. Sa nasabing video, makikitang glowing at elegant ang aktres habang ipinapakita ang kanyang baby bump, na agad nag-trending online.

Bukod pa riyan, kamakailan lang ay nag-celebrate sina Lovi at Monty ng kanilang ikalawang wedding anniversary. Maraming netizens ang nakaalala ng kanilang intimate civil wedding na sinundan ng grand fairy-tale ceremony sa Cliveden House sa United Kingdom — isang napaka-romantikong venue na naging simbolo ng kanilang pag-iisang dibdib.

Si Monty Blencowe ay isang Hollywood producer na nakilala sa ilang international film projects, habang si Lovi naman ay patuloy na umaarangkada sa kanyang showbiz career sa Pilipinas at abroad. Sa ngayon, marami ang nag-aabang kung kailan niya ibabahagi sa publiko ang unang sulyap sa kanilang baby.

Habang wala pang detalye, siguradong bagong yugto ng inspirasyon at pagmamahal ang haharapin ni Lovi sa kanyang buhay bilang isang first-time mom.

Larawan: Lovi Poe Instagram