MANILA — Sa unang pagkakataon mula nang ilunsad ito noong 2010, hindi gaganapin ngayong taon ang taunang Magpasikat segment ng It’s Showtime bilang bahagi ng 16th anniversary celebration ng programa. Kinumpirma ito mismo ni Vice Ganda sa live episode ng show noong Oktubre 24, 2025.

Ayon kay Vice Ganda, napagdesisyunan nilang huwag munang ituloy ang Magpasikat dahil sa sobrang taas ng production cost ng bawat team.

 “Every year, per day, per prod, minimum of six million pesos. Minsan umaabot pa ng ten million,” paliwanag ni Vice.

Dagdag pa niya, kung dati ay kaya nilang pondohan ang engrandeng segment, ngayon ay hindi na praktikal lalo’t may iba pa silang gastusin sa programa.

“Dati ang saya kasi afford namin. Right now, unfortunately and realistically, we can’t afford that anymore,” aniya sa interview.

Bagama’t walang Magpasikat, tiniyak ni Vice na hindi mawawala ang kasiyahan sa 16th anniversary celebration ng It’s Showtime.

Sa halip na mga engrandeng production number, magpo-focus sila sa mas “makabuluhang” selebrasyon.

Magkakaroon ng week-long special ng segment na Laro Laro Pick, kung saan mas bibigyang-diin ang pakikipag-ugnayan sa madlang people at pagtulong sa mga nangangailangan.

Ililipat din sa Disyembre ang ilan sa mga anniversary activities para mas mapaghandaan at mapaganda pa ang mga ito.

Ayon kay Vice: “Ngayong taon, gusto naming gawing mas makabuluhan ang celebration. Hindi lang pagpapatawa o pasabog, kundi pag-abot din ng tulong sa ating mga kababayan.”

Simula pa noong 2010, naging trademark na ng It’s Showtime ang Magpasikat—ang taunang kompetisyon ng mga host kung saan nagpapasiklaban sila sa mga bonggang performance bilang handog sa madlang people.

Ang pagbitaw muna rito ngayong taon ay isang malaking pagbabago, at simbolo ng mas praktikal at makataong direksyon ng programa sa gitna ng tumataas na gastos sa produksyon.

May mga nalungkot dahil inaabangan nila taon-taon ang Magpasikat, ngunit marami rin ang pumuri sa desisyong magpakatotoo ni Vice.

Isa sa mga komento ng netizens: “Tama lang ‘yan. Mas maganda na ilaan na lang ang milyon-milyong gastos sa mga taong mas nangangailangan.”

Sa halip na puro palabas at pasabog, mas pinipili ngayon ng It’s Showtime na ipakita ang puso nito bilang programang malapit sa masa.

Kahit wala ang Magpasikat ngayong taon, patunay ito na handang magbago ang show para manatiling makabuluhan at makatotohanan sa mga Pilipinong manonood.

Larawan mula sa Abs Cbn