Disyembre 22, 2025 – Muntik nang sumailalim sa operasyon si Carlo Aquino matapos madiskubre ng kanyang mga doktor na may bara sa kanyang puso—isang health scare na ikinagulat maging ng aktor mismo.

Ibinahagi ng Kapamilya star ang pinagdaanang kondisyon nang makatsikahan siya ng ilang miyembro ng entertainment media bago magsimula ang Metro Manila Film Festival (MMFF) Parade of Stars noong December 19.

Present si Carlo sa event bilang bahagi ng pelikulang “Bar Boys After School,” ang sequel ng hit 2017 film na Bar Boys sa direksyon ni Kip Oebanda. Kasama pa rin sa pelikula ang original cast na sina Kean Cipriano, Enzo Pineda, at Rocco Nacino.

Kapansin-pansin sa press ang biglang pagpayat ng aktor—na siya ring naging daan upang ikuwento niya ang seryosong pinagdaanang health issue nitong mga nagdaang buwan.

Ayon kay Carlo, halos sabay-sabay niyang ginawa ngayong taon ang ilang proyekto gaya ng It’s Okay To Not Be Okay, The Time That Remains, Bar Boys After School, at ang upcoming film nila ni Bela Padilla na nakatakdang ipalabas sa 2026.

Dahil dito, aminado siyang unti-unting bumigay ang kanyang katawan.

“Parang nag-decline yung health ko and nakakita sila ng parang bara sa puso ko,” pahayag ng aktor.

“Muntik na (maoperahan), buti na lang chineck nila agad.”

Sa kabutihang-palad, matapos ang serye ng medical tests, napag-alamang hindi na kailangan ng stent o major operation, bagama’t kinailangan niyang sumailalim sa mahigpit na lifestyle change.

“Wala namang opera pero marami na akong maintenance—for cholesterol, for high blood,” ani Carlo.

“Hindi na ako nagbe-vape, nag-quit na.”

Dagdag pa ng aktor, matagal na rin niyang itinigil ang pag-inom ng alak matapos siyang makitaan ng mataas na uric acid.

“Ang pinaka-bisyo ko na lang ngayon ay kape—at siyempre, my daughter and my wife,” biro niya sabay tawa.

Sa kabila ng health scare, positibo pa rin ang pananaw ni Carlo sa buhay. Aniya, natutunan na raw niyang i-“reframe” ang mga mabibigat na pagsubok upang manatiling mentally at emotionally healthy.

“Kailangan mong baguhin yung perspective mo sa problema. Kaya siguro hindi tayo agad tumatanda,” ani pa niya.

Sa edad na 40, patuloy na hinahangaan si Carlo hindi lang sa kanyang husay sa pag-arte kundi pati sa kanyang determinasyong unahin ngayon ang kalusugan—isang paalala na kahit ang mga bida sa pelikula, dumadaan din sa totoong laban sa likod ng kamera.