Hindi lang pala ordinaryong turista ang nabibiktima ng pananamantala — kahit ang K-Pop idol na si Choi Soobin ng Tomorrow X Together ay muntik na ring mapasubo sa isang umano’y taxi scam habang nagbabakasyon sa Cebu City.

Agad itong naging usap-usapan online matapos lumabas sa vlog ng grupo ang ilang hindi inaasahang aberya sa kanilang trip. Tanong ng netizens: paano nangyari na ang simpleng biyahe ay biglang naging halos triple ang presyo? At sinadya ba talaga ng driver, o isa lang itong malaking misunderstanding?

Sa vlog na inilabas sa YouTube channel ng grupo, makikita na bago pa man makarating sa Pilipinas ay may kaunting sablay na agad sina Soobin at ang kasama niyang kaibigan matapos silang mag-book sa maling airport terminal sa Korea. Kaya naman tanong ng mga fans: bad omen na ba agad ang nangyaring iyon para sa kanilang trip?

Pero mas lalong nagka-drama ang kanilang bakasyon pagdating sa Cebu nang sumakay sila sa taxi papunta sa kanilang hotel. Ayon sa booking app, nasa P300 lamang sana ang pamasahe — pero nakipag-usap umano ang driver na gawing P500 dahil mahal daw ang gasolina.

Nagulat si Soobin sa paliwanag ng driver at sinabi sa video, “Five hundred? But we checked the app, and it’s saying it’s only like 300.” Sagot naman umano ng driver, “It’s because the gas is very expensive.”

Pero dito na nagsimulang tumaas ang kilay ng fans. Kung nagkasundo na sa P500, bakit biglang may panibagong presyo?

Mas lalo pang ikinagulat ng idol nang pagdating nila sa hotel ay tila humirit muli ang driver — at sinabing P1,000 na raw ang babayaran.

Dismayado si Soobin habang ikinukuwento ang nangyari. “Just now, he said 1,000 pesos… I mean, 500 pesos is already pushing it. And then he raises it to 1,000 pesos,” ani ng K-Pop star habang nasa sasakyan pa.

Pagkababa sa hotel, muling ikinuwento ni Soobin ang insidente habang naglalakad sila papasok ng lobby. Ayon sa kanya, sinubukan pa rin umano ng driver na ipilit ang P1,000 na bayad kahit may napagkasunduan na sila.

“We told him firmly that we were only going to pay 500 pesos,” paliwanag niya.

Kaya naman tanong ngayon ng ilang netizens: modus ba ito ng ilang driver laban sa mga turista? O baka naman may nangyaring hindi lang naipakita sa video?

Sa kabila ng nakakainis na pangyayari, pinili na lamang nina Soobin na huwag na itong palakihin. Ayon sa idol, pagod na rin sila kaya mas pinili nilang i-brush off na lang ang insidente.

“It’s fine, let’s keep it breezy, because we’re way too tired for this right now,” sabi pa niya.

Pero hindi napigilan ng mga fans — lalo na ang mga taga-Cebu — na maglabas ng reaksyon online. Marami ang nagsabing nakakahiya raw kung totoong may ganitong nangyari sa isang international artist na bumibisita sa Pilipinas. Tanong tuloy ng netizens: isolated case lang ba ito, o may mas malalim pang problema sa transport experience ng ilang turista?

Sa kabila ng maliit na aberya, hindi naman nasira ang buong bakasyon ng TXT leader. Sa katunayan, nag-enjoy pa rin sila sa kanilang apat na araw sa Cebu kung saan sinubukan nila ang zip-lining, canyoneering, at scuba diving.

Babalik pa kaya si Soobin sa Pilipinas sa kabila ng kanyang naging karanasan? O isa na itong travel story na matatawa na lang siya kapag naaalala?