Simula Abril 2, 2025, tataas ang pamasahe sa Light Rail Transit Line 1 (LRT-1) sa Metro Manila matapos aprubahan ito ng Department of Transportation (DOTr).

Hiniling ng Light Rail Manila Corporation (LRMC) ang fare hike upang matustusan ang patuloy na maintenance at pagpapaganda ng lumang railway system.

Sa bagong fare structure, tataas ang minimum na pamasahe para sa single journey tickets mula PHP 15 patungong PHP 20. Para sa mga pasaherong bibiyahe mula Fernando Poe Jr. station sa Quezon City hanggang Dr. Santos station sa Parañaque, aakyat ang pamasahe mula PHP 45 patungong PHP 55. Samantala, ang mga gumagamit ng stored value cards ay magbabayad ng PHP 52 mula sa dating PHP 43.

Ipinaliwanag ni LRMC President at CEO Enrico Benipayo na kailangang itaas ang pamasahe upang masuportahan ang patuloy na investment sa maintenance, upgrades, at pagpapalawak ng railway.

“Kailangan ng pampublikong transportasyon ang tuloy-tuloy na investment para mapanatili itong maayos at ligtas. Sa mga bansang may world-class na transport system tulad ng Singapore at Japan, regular na ina-adjust ang pamasahe para mapanatili ang kalidad ng serbisyo,” ani Benipayo.

Dagdag pa niya, ito pa lamang ang pangalawang beses na pinayagan ang fare adjustment sa nakalipas na sampung taon, sa kabila ng paulit-ulit na petisyon ng LRMC.

Bago aprubahan ang taas-pasahe, nagsagawa ang DOTr ng public hearing noong Enero 2025 kung saan tinalakay ang mga opinyon ng iba’t ibang sektor. Alinsunod ito sa concession agreement sa gobyerno, na nagbibigay ng pahintulot sa 10.25 porsyentong fare increase kada dalawang taon, o katumbas ng 5 porsyentong pagtaas kada taon.

Mula nang pamahalaan ng LRMC ang LRT-1 noong Setyembre 2015 sa ilalim ng PHP 65-bilyong, 32-taong concession agreement sa DOTr at Light Rail Transit Authority (LRTA), marami nang pagbabagong naisagawa, kabilang ang pagpapakilala ng bagong mga tren, modernisasyon ng mga istasyon, at pagpapahusay ng serbisyo.

“Napanatili namin ang 100 porsyentong performance sa system reliability, punctuality, at availability. Mula 106 minuto noong 2015, bumilis ang cycle time ng isang buong biyahe sa 91 minuto nitong 2024,” paliwanag ni Benipayo.

Inaasahang makakatulong ang fare increase sa patuloy na pag-unlad at pagpapanatili ng LRT-1 bilang isang maaasahan at epektibong transportasyon para sa mga commuter sa Metro Manila.

Sa kabila ng taas-pasahe, tiniyak ni Benipayo na nananatiling abot-kaya at environment-friendly na opsyon ang LRT-1 para sa mga pasahero.