Arestado ang isang 32-anyos na lalaki sa isang buy-bust operation na isinagawa ng mga operatiba ng District Special Operations Unit (DSOU) ng Southern Police District (SPD) at ng Muntinlupa Police Station sa Biazon Road sa Barangay Poblacion, Muntinlupa City, noong madaling araw ng Huwebes, Pebrero 20, 2025.

Ayon kay Police Lt. Margaret Panaga, officer-in-charge ng SPD Public Information Office (PIO), isang confidential informant ang nagbigay impormasyon sa kanila tungkol sa isang indibidwal na umano’y nag-aalok ng mga baril na ibinebenta.

"Nagkasunduan po sila na magkita sa Biazon Road... noong Pebrero 20, at agad na isinagawa ang buy-bust operation na nagresulta sa matagumpay na pagkakahuli ng suspek," sabi ni Panaga.

Narekober mula sa suspek ang isang kalibre .45 na baril na ibinenta sa halagang P20,000, isang kalibre .45 na magazine na may tatlong bala, at isang granada. Nakuha rin mula sa suspek ang P1,000 na ginamit bilang marked money, isang cellphone, at isang sling bag.

"Kasalukuyan po naming vinavalidate kung may iba pang kinasasangkutan ang suspek at kung mayroon siyang mga dating kaso," dagdag pa ni Panaga.

Ayon sa Philippine National Police (PNP), hindi itinanggi o inamin ng suspek ang krimen. Hindi rin siya nakapagpakita ng anumang legal na dokumento para sa baril at granada.

"Tahimik po siya, ngunit ang pagkakahuli sa kanya sa aktwal na transaksyon ay nagbibigay ng matibay na ebidensya ng kanyang pagkakasangkot sa ilegal na pagbebenta at pagmamay-ari ng baril," paliwanag ni Panaga.

Ang suspek ay kasalukuyang naka-detain sa SPD CIDG Detention Facility at nahaharap sa mga kasong paglabag sa RA 10591 o ang Comprehensive Firearms and Ammunition Regulation Act of 2013, RA 9516 para sa Illegal Possession of Explosives kaugnay ng RA 7166, at Comelec Resolution 11067 para sa gun ban. Ang matagumpay na pagkakahuli sa suspek ay nagsisilbing paalala mula sa PNP na seryoso silang ipinatutupad ang nationwide gun ban upang matiyak ang isang mapayapa at ligtas na halalan sa Mayo.

"Hinihikayat namin ang publiko na maging mapagmatyag at i-report ang anumang ilegal na gawain, lalo na ang pagbebenta at pagmamay-ari ng mga ilegal na armas," pahayag ni Panaga.

Larawan: Bea Cuadra/ABS-CBN