DOT, tiniyak ang ligtas na biyahe ng mahigit 30M turista ngayong Semana Santa
Margret Dianne Fermin • Ipinost noong 2025-04-11 18:54:02
April 11, 2025 — Tiniyak ng Department of Tourism (DOT) ang ligtas at maayos na biyahe ng mahigit 30 milyong domestic at international na turista sa panahon ng Semana Santa, ayon kay Tourism Secretary Christina Garcia-Frasco.
Inilunsad ng DOT ang mga regional operations center sa buong bansa upang bantayan ang mga pangunahing destinasyon at pasiglahin ang inter-agency coordination, na naka-sentro sa kaligtasan at kaginhawaan ng mga bumibiyahe.
“Overall, we are delighted to note that Filipinos are actively traveling within the country, and our international tourists are enjoying experiential—meaningful and enriching—experiences,” pahayag ni Frasco sa isang panayam sa Ninoy Aquino International Airport noong Abril 10.
Binigyang-diin ng DOT ang kahalagahan ng paggamit ng DOT-accredited establishments upang matiyak ang kalidad ng serbisyo at makaiwas sa panlilinlang.
“We continue to encourage both international and local travelers to choose DOT-accredited establishments as we prioritize tourist safety and convenience. These accredited establishments have undergone a thorough accreditation process, ensuring that visitors receive truly high-quality experiences,” giit ni Frasco.
Kabilang sa mga pinakatampok na destinasyon ngayong Holy Week ang Cebu, Bohol, Boracay, Palawan, Siargao, Baguio, Batangas, Ilocos Norte at Sur, Pampanga, Pangasinan, at Puerto Galera. Tumaas din ang interes sa Camiguin, Siquijor, at Cagayan de Oro, habang nag-ulat ng pagtaas ng arrivals ang Davao at Sarangani sa Mindanao.
Sa Metro Manila, nanatiling popular ang Intramuros bilang heritage at faith tourism site, at inaasahang aabot sa 2.4 milyon ang bibisita, mula sa 2.2 milyon noong 2023.
Para tugunan ang mga alalahanin ng turista, nagbigay ang DOT ng 24/7 Tourist Assistance Call Center (TACC) ng multilingual support, kabilang ang Korean at Mandarin. Tumanggap na ang TACC ng mahigit 14,000 inquiries mula sa 72 bansa.
“I also just want to remind na active po, and live ‘yung ating Tourist Assistance Call Center. +151-TOUR. Maari po nilang tawagan kung meron silang queries or request for assistance anywhere across the country,” dagdag ni Frasco.