Abril 15, 2025 — Ipinagbawal ng pamahalaang lokal ng Malay, Aklan ang mga party at event na may malalakas na tugtugin sa Boracay sa Biyernes Santo, Abril 18, bilang bahagi ng pagpapanatili ng kabanalan ng Mahal na Araw.

Sa pamamagitan ng Memorandum Order No. 2025-33, iniutos ni Malay Mayor Frolibar Bautista na walang ibibigay na special permits para sa anumang aktibidad na may kasamang malalakas na musika mula alas-6 ng umaga ng Abril 18 hanggang alas-6 ng umaga ng Abril 19 (Sabado de Gloria).

“Boracay is a world-famous tourist destination, but we must also respect the significance of Good Friday,” ani Bautista. “This measure ensures that the island remains a place for reflection and spiritual observance during Holy Week.”

Bagamat kilala ang Boracay sa mga white sand beach at masiglang nightlife, matagal nang ipinatutupad ng lokal na pamahalaan ang pagbabawal sa maiingay na aktibidad tuwing Biyernes Santo. Nakaangkla ito sa 2009 Sangguniang Bayan resolution na nagbabawal sa mga party at malalakas na tugtugin sa isla tuwing Mahal na Araw.

Pinagtibay ni Malay Vice Mayor Niño Carlos Cawaling ang kautusan sa pamamagitan ng direktiba sa Business Permits and Licensing Office na huwag mag-isyu ng anumang event permit para sa Biyernes Santo. “Parties are only allowed until Maundy Thursday and may resume on Black Saturday,” paliwanag ni Cawaling.

Bahagi ang patakarang ito ng mas malawak na polisiya ng Boracay na nagsusulong ng balanse sa pagitan ng turismo at paggalang sa kultura at pananampalataya.

Nagpaalala ang LGU sa mga turista at negosyante na sumunod sa kautusan. Magpapatrolya ang mga enforcement team sa buong isla para tiyaking nasusunod ang alituntunin.