ABRIL 22, 2025 — Kinumpirma ng pulisya na pitong empleyado ng bakery ang brutal na pinaslang sa pamamagitan ng saksak nang madaling araw ng Martes sa Barangay Cupang, Antipolo City. Sumurrender nang maglaon ang suspek sa Camp Crame, ngunit hindi pa malinaw ang motibo niya.

Ayon kay PCol. Felipe Maraggun, hepe ng Rizal police, nakatanggap sila ng report mula sa isang barangay watchman bandang 8 a.m. tungkol sa stabbing incident sa J&B Malunggay Bakery. Nang dumating ang mga pulis, natagpuan nila ang mga biktima — pawang mga lalaking trabahador na doon din nakatira — na patay na dahil sa maraming saksak.

Sinabi pa ni Maraggun na ayon sa initial investigation, pumasok ang suspek sa bakery bandang 6 a.m. at sinaksak ang mga biktima habang tulog ang mga ito. Walang nakitang bakas ng paglalaban, na nagpapahiwatig na hindi nakaalma ang mga biktima.

Sumurrender ang suspek — na hindi pa inilalabas ang pagkakakilanlan — ilang oras makalipas ang insidente sa headquarters ng Philippine National Police. Iniimbestigahan ng awtoridad ang posibleng motibo, kasama na ang mga nakaraang away, ngunit wala pang karagdagang detalye na ibinunyag.

(Larawan: Philippine National Police)