MAYNILA, Pilipinas — Sinuspinde ng Land Transportation Office (LTO) ang 107 paaralan sa pagmamaneho sa buong bansa dahil sa umano’y pagbibigay ng “non-appearance” services, na nagpapahintulot sa mga aplikante na makakuha ng lisensya nang hindi dumaraan sa kinakailangang teoretikal at praktikal na pagsasanay.

Kinumpirma ni LTO Assistant Secretary Vigor Mendoza II na natuklasan ang mga paglabag sa pamamagitan ng audit trail na isinagawa sa iba’t ibang rehiyon, lalo na sa Metro Manila, Gitnang Luzon, at Calabarzon.

“Na-audit trail namin 'yan. Sa nakalipas na dalawang linggo, nasa 107 driving schools na ang sinuspinde natin sa iba’t ibang rehiyon,” pahayag ni Mendoza sa isang press briefing.

Aniya, halos 90 porsyento ng mga kaso ay may kinalaman sa pagpapalabas ng pekeng Theoretical Driving Course (TDC) certificates sa mga aplikanteng hindi dumalo sa anumang training.

Naglabas ang LTO ng show-cause orders sa mga apektadong paaralan upang ipaliwanag ang kanilang panig. Gayunpaman, mananatili ang suspensyon habang isinasagawa ang imbestigasyon.

Binigyang-diin din ni Transportation Secretary Vince Dizon ang kahalagahan ng pagpapatibay sa kaligtasan sa kalsada.

“Ang sabi ng Pangulo, para sa kapakanan at kaligtasan ng ating mga kababayan na araw-araw nasa kalsada, kailangan nating tuluyang ayusin ang sistema ng road safety,” ani Dizon.

Pinaigting din ng ahensya ang kampanya laban sa mga fixer na nagbebenta ng pekeng lisensya sa online. Babala ni Mendoza, ang mga mahuhuling gumagamit ng pekeng dokumento ay maaaring maharap sa kasong kriminal gaya ng falsification of public documents, na may parusang hanggang 12 taong pagkakakulong.

Hinimok ng LTO ang publiko na isumbong ang anumang kahina-hinalang aktibidad kaugnay ng aplikasyon ng lisensya at tiniyak na ipatutupad ang mas mahigpit na panuntunan sa mga susunod na proseso.