MAYNILA, Pilipinas — Nasamsam ng Bureau of Customs (BOC) ang mahigit ₱15.8 bilyon halaga ng pekeng produkto mula sa mga bodega sa Divisoria, Maynila, sa isa sa pinakamalalaking operasyon laban sa paglabag sa intellectual property rights sa mga nakaraang taon.

Natuklasan ng mga awtoridad ang mahigit 1.7 milyong piraso ng mga pekeng produkto gaya ng bag, damit, at accessories na may mga hindi awtorisadong tatak tulad ng Guess, Michael Kors, Coach, Louis Vuitton, at Tory Burch.

Isinagawa ang operasyon noong Mayo 23, 2025 ng Customs Intelligence and Investigation Service – Intellectual Property Rights Division (CIIS-IPRD) ng BOC, kasama ang mga kinatawan mula sa Guess Philippines.

“These fakes aren’t just illegal. They endanger consumers and destroy legitimate businesses,” pahayag ni Atty. Kristian Nico Acosta, legal head ng Guess Philippines.

Aniya, matagal nang iniulat sa Intellectual Property Office of the Philippines (IPOPHIL) ang mga bodega na sinalakay dahil sangkot ang mga ito sa bentahan ng mga pekeng produkto sa tindahan at online.

Muling iginiit ni BOC Commissioner Bienvenido Rubio ang dedikasyon ng ahensya sa paglaban sa smuggling at sa pangangalaga ng karapatang intelektwal.

“We are serious about our mission to keep counterfeit goods out of the country. This is about protecting the public, supporting legitimate businesses, and ensuring a level playing field in the market,” aniya.

Binigyang-diin ng BOC na maaaring magdulot ng panganib sa kalusugan at kaligtasan ang mga pekeng produkto, at sinisira rin nito ang patas na kompetisyon sa merkado. Nangako ang ahensya na ipagpapatuloy ang pakikipagtulungan sa mga brand owner, digital platform, at enforcement agencies upang paigtingin ang kampanya laban sa pekeng kalakal.