HUNYO 3, 2025 — Kahit na-delay ang rehabilitation project sa Edsa, ipapatupad pa rin ng gobyerno ang No-Contact Apprehension Policy (NCAP) dahil epektibo raw ito sa pagbawas ng traffic violations.

Ipinaliwanag ni Transportation Secretary Vince Dizon na hindi direktang konektado ang NCAP sa pag-aayos ng Edsa, kundi bahagi ito ng mas malawakang hakbang para disiplinahin ang trapiko.

"It’s about a more efficient way of enforcing our traffic rules," sabi niya sa press briefing noong Lunes.

(Tungkol ito sa mas mabisang paraan para ipatupad ang ating mga batas-trapiko.)

Ayon sa datos ng Metropolitan Manila Development Authority (MMDA), bumaba ang bilang ng mga violator mula nang maibalik ang NCAP noong Mayo 26, matapos i-lift ng Supreme Court ang suspensyon nito. Mula 1,112 noong unang araw, bumaba ito sa 489 pagdating ng Mayo 31.

Giit ni Gabriel Go, hepe ng special operations ng MMDA, na nagdudulot ng kaligtasan at kaayusan sa kalsada ang polisiyang ito.

"It is the Supreme Court that ordered us to reimplement it so we are complying with the ruling," pahayag niya.

(Ang Supreme Court ang nag-utos na ibalik ito kaya sumusunod lang kami sa desisyon.)

Samantala, mahigpit na binabantayan ng Land Transportation Office (LTO) ang mga motoristang nagtatakip ng plaka para iwasan ang NCAP. Binalaan ni LTO Chief Vigor Mendoza II na maaaring makumpiska ang lisensya ng mga lalabag, ayon sa parusa sa ilalim ng Motorcycle Crime Prevention Act.

Tungkol naman sa rehab ng Edsa, inutusan ni Pangulong Marcos na repasuhin ang plano para umikli ang orihinal na dalawang taong timeline. Sinabi ni Dizon na may isang buwan ang Department of Transportation para ayusin ang plano, na layong bawasan ang abala sa publiko.

Sang-ayon si Senate President Francis Escudero sa pag-antala, at binatikos ang Department of Public Works and Highways (DPWH) sa kakulangan sa paghahanda.

"For me, it was only right to postpone it because the DPWH seems to lack planning here," pahayag niya. “And two or three years is too long to do that.”

(Para sa akin, tama lang na i-delay ito dahil kulang sa plano ang DPWH dito. At masyadong mahaba ang dalawa o tatlong taon para gawin iyon.)

Ang P8.7-bilyong proyekto, na dapat magsisimula sa Hunyo 13, ay nakalaan para sa pag-aayos ng kalsada, drainage, at sidewalks sa kahabaan ng 24-kilometrong highway.

(Larawan: Facebook)