HUNYO 5, 2025 — Inilunsad ng pamahalaan ang bagong programa na "Kadiwa ng Bagong Bayaning Mangingisda" (KBBM) sa Palawan noong Miyerkules upang mas mapalakas ang suporta sa mga mangingisda sa West Philippine Sea (WPS). Pinangunahan ito ng Philippine Coast Guard (PCG) at Bureau of Fisheries and Aquatic Resources, kung saan direktang mabibili ng isang government vessel ang huli ng mga mangingisda sa dagat, kaya’t mababawasan ang gastos at mas mapapatatag ang kita.

Iba sa tradisyonal na pamilihan, tinatanggal ng KBBM ang mga middleman sa pamamagitan ng agarang pagbili ng isda pagkatapos mahuli. May fuel subsidies at ice supplies din para mas mapahaba ang biyahe ng mga mangingisda. 

"This Kadiwa program aims to streamline the selling process for fishermen by subsidizing the procurement of their fresh catch directly at sea, which effectively lowers their operational costs," pahayag ni PCG spokesperson Commodore Jay Tarriela.

(Layunin ng programang Kadiwa na gawing mas madali ang pagbebenta ng huli sa pamamagitan ng direktang pagbili sa dagat, na magpapababa sa kanilang operational costs.)

Sumunod ang Palawan sa pilot rollout ng proyekto noong Mayo 9 malapit sa Scarborough Shoal sa Zambales. Balak ng mga awtoridad na magsagawa ng buwanang misyon sa mga pangunahing fishing areas, kasama ang Kalayaan Island Group, sa huling bahagi ng taon.

Bukod sa tulong pinansyal, pinapalakas din ng programa ang presensya ng mga Pilipino sa mga pinag-aagawang karagatan. Sa kabila ng tensyon sa China, sinisiguro ng PCG escort ang kaligtasan ng mga lokal na mangingisda.

Dahil sa mataas na gastos sa fuel at yelo na nagiging dahilan ng maikling biyahe, maaaring maging malaking tulong ang KBBM sa mga komunidad sa WPS — gagawing mas matatag ang kita sa gitna ng mga panganib.

(Larawan: PTV News)