HULYO 6, 2025 — Nagpakita ng mga senyales ng muling pagkilos ang Bulkang Taal matapos maganap ang dalawang volcanic earthquakes sa loob ng 24 oras, ayon sa ulat ng mga state volcanologists nitong Linggo. Ang mga lindol, na naitala noong Sabado, ang unang seismic movements mula noong Hunyo 27, ayon sa Philippine Institute of Volcanology and Seismology (Phivolcs).

Ipinahayag ng Phivolcs na ang volcanic quakes — hindi tulad ng tectonic quakes — ay may kinalaman sa paggalaw ng magma sa ilalim ng bulkan. Kasabay ng seismic activity, naglabas ang Taal ng 377 metric tons ng sulfur dioxide, na umabot sa 1,200 metro ang taas bago kumalat. Walang naobserbahang volcanic smog o anumang kakaibang pagbabago sa crater lake.

Ipinanatili ang Alert Level 1 sa Taal, na nangangahulugang mababa pa rin ang aktibidad nito. Gayunpaman, binabalaan ng Phivolcs ang publiko na huwag maging kampante, dahil ang pagbaba ng emissions ay hindi nangangahulugang wala nang panganib. Giit ng ahensya, abnormal pa rin ang estado ng Bulkang Taal.

Isa sa pinaka-aktibong bulkan sa bansa, 38 beses nang pumutok ang Taal sa kasaysayan. Dahil nasa loob ito ng lawa, mas delikado ang panganib na dala nito, kaya mahalaga ang patuloy na pagmo-monitor. Pinapaalalahanan ng mga awtoridad ang lahat na mag-ingat sa paligid ng bulkan.

(Larawan: UP Resilience Institute - University of the Philippines)