MAYNILA — Muling iginiit ni Pangulong Ferdinand Marcos Jr. ang pangako ng kanyang administrasyon na ipatupad ang ₱20 kada kilong bigas, sa pagsabing ang programang ito ay “achievable” at “sustainable” at malapit nang maging mas malawak sa mga pampublikong pamilihan sa buong bansa.

Sa isang vlog na inilabas nitong Linggo, inilahad ng Pangulo na ang programang tinawag na Benteng Bigas Meron Na! (BBM) ay bahagi ng mas malawak na layunin ng pamahalaan na gawing abot-kaya ang pagkain para sa mga mahihirap habang pinatitibay ang sektor ng agrikultura sa pamamagitan ng pagtutulungan ng pambansa at lokal na pamahalaan.

“₱20 rice is here to stay. It is achievable, it is sustainable. Kaya abangan ninyo in your nearest public markets,” pahayag ni Marcos.

Sa kasalukuyan, ibinebenta ang subsidiadong bigas sa mga Kadiwa ng Pangulo outlet at nakalaan ito para sa mga pamilyang nasa laylayan ng lipunan, mga senior citizen, persons with disabilities (PWDs), solo parent, at minimum wage earners. Target ng Department of Agriculture (DA) na maabot ang isang milyong benepisyaryo bago matapos ang taon.

Bilang tugon sa pangambang maapektuhan ang kabuhayan ng mga magsasaka, tiniyak ni Marcos na may mga pananggalang na ipinatutupad. “Kahit ano pa ang maging presyo ng bigas, hindi po bababa dito ang pagbili ng NFA sa palay mula sa ating mga magsasaka,” aniya, na tinutukoy ang mandato ng National Food Authority (NFA) na bumili ng basang palay sa halagang ₱18 kada kilo at tuyong palay sa ₱19 hanggang ₱23 kada kilo.

Binanggit din ng Pangulo ang pagpapalawak ng mga pasilidad sa pagpoproseso ng bigas at pagpapatuyo nito upang matulungan ang mga magsasaka na hindi mapilitang ibenta ang basang palay sa bagsak na presyo ng mga trader. “With a dryer, a farmer can sell his dried rice anywhere. He won’t be forced to sell his rice at whatever price the trader gives him,” paliwanag niya.

Isa ito sa mga pangunahing pangako ni Marcos noong kampanya noong 2022. Ngayon ay mayroon na itong 94 na lugar ng implementasyon, kabilang ang bagong bukas na site sa Zapote Public Market sa Bacoor, Cavite.

Habang nanunumpa na ang mga bagong halal na opisyal nitong Hunyo 30, hinimok sila ni Marcos na ituon ang trabaho sa serbisyong publiko at makipagtulungan sa mga lokal na pamahalaan upang maayos na maipatupad ang mga programang tulad ng BBM. “Tapos na po ang bahagi ng politika, serbisyo publiko na ang haharapin niyo ngayon,” aniya.