HULYO 14, 2025 — Isinusulong ni Senator Panfilo Lacson ang isang panukalang batas para i-modernisa ang Anti-Wiretapping Act, kung saan isasama ang mga delikadong krimen tulad ng drug trafficking, pagtatangkang kudeta, at malawakang pagnanakaw bilang mga kaso na maaaring pahintulutan ng legal na surveillance.

Pinapalawig niya ang sakop ng Republic Act 4200, isang batas na may anim na dekada na, para payagan ang awtoridad na makapag-intercept ng pribadong komunikasyon — pero kailangan ng pahintulot ng hukuman. Giit ni Lacson, dating hepe ng pulisya, na bagama't epektibo ang wiretapping sa paglaban sa malalaking banta, may mga pagkukulang pa rin sa kasalukuyang batas na naglalagay sa seguridad ng bansa sa alanganin.

"Unfortunately, there are still certain crimes that are not covered under the said exceptional cases, which put not only the lives and property of our people in paramount danger, but also pose a grave threat to our nation’s security," pahayag niya.

(Sa kasamaang palad, may ilang krimen na hindi sakop ng mga eksepsiyon, na hindi lamang naglalagay sa buhay at ari-arian ng mga tao sa panganib, kundi nagdudulot din ng malubhang banta sa seguridad ng bansa.)

Mahigpit din ang ipinapataw ng panukala sa paggamit ng wiretapping devices, kung saan malalaking multa at pagkakakulong ang parusa sa illegal na pagbenta o pag-operate nito.

Pwede makulong ng tatlo hanggang anim na taon at multahan ng hanggang P2 milyon ang mga gumagawa o nagbebenta ng surveillance equipment nang walang pahintulot. Habang-buhay namang matatanggal sa serbisyo publiko ang mga opisyal na mahahatulan sa ilalim ng batas na ito.

Layon ng panukala na balansehin ang kakayahan ng mga awtoridad na labanan ang krimen habang pinoprotektahan ang privacy ng mga mamamayan na tiyak na may pangangasiwa ng hukuman at limitado lamang sa mga kritikal na kaso. 

(Larawan: Philippine News Agency)