MANILA — Nagbabala ang Philippine Atmospheric, Geophysical and Astronomical Services Administration (PAGASA) ngayong Biyernes na ang binabantayang low pressure area (LPA) sa silangang bahagi ng Northern Luzon ay may mataas na posibilidad na maging isang tropical depression sa loob ng 24 oras.

Ayon sa 4 a.m. weather bulletin ng PAGASA, ang LPA ay huling namataan sa layong 150 kilometro silangan ng Baler, Aurora. “If the LPA develops into a Tropical Depression, Tropical Cyclone Wind Signal No.1 may be hoisted immediately over some localities in Central and Northern Luzon due to its close proximity to the landmass,” ayon sa ahensya.

Kapag tuluyang naging bagyo, ito ay papangalanang “Isang,” ang unang tropical cyclone sa bansa ngayong buwan. Inaasahan ang pag-ulan na aabot sa 50–100mm sa mga lalawigan ng Cagayan, Isabela, Quirino, Nueva Vizcaya, Nueva Ecija, Tarlac, Ifugao, Benguet, La Union, Bataan, Zambales, Pangasinan, Aurora, Quezon, Camarines Norte, at Camarines Sur.

Bukod sa LPA, patuloy ding nakakaapekto ang southwest monsoon o habagat sa malaking bahagi ng Luzon, Visayas, at Mindanao. Metro Manila, Ilocos Region, Cordillera Administrative Region, Cagayan Valley, Central Luzon, Laguna, Quezon, Rizal, Camarines Norte, at Camarines Sur ay makararanas ng maulap na kalangitan na may kalat-kalat na pag-ulan at pagkidlat-pagkulog.

Pinapayuhan ng PAGASA ang publiko, lalo na sa mga lugar na posibleng maapektuhan, na maging alerto sa posibleng pagbaha at landslide dulot ng malalakas na pag-ulan. Patuloy ang monitoring ng ahensya sa galaw ng LPA at maglalabas ng mga update sa mga susunod na oras.

Larawan mula sa DOST-PAGASA