AGOSTO 27, 2025 — Pumanaw na si Judy Araneta-Roxas, ina ni dating Senador Mar Roxas, sa edad na 91 noong Martes ng umaga, ayon sa pahayag ng kanyang anak sa social media.

“We are very sad to share that our mother Judy Araneta Roxas passed away peacefully this morning, surrounded by family and loved ones,” ani Mar Roxas sa Facebook. 

(Lubos naming ikinalulungkot na ibahagi na ang aming ina, si Judy Araneta Roxas, ay payapang pumanaw ngayong umaga, kasama ang pamilya at mga mahal sa buhay.)

Hindi pa inilalabas ang detalye ng burol.

Si Judy ay kilala sa tahimik ngunit matatag na presensya sa likod ng Liberal Party. Isa siya sa mga nasugatan sa Plaza Miranda bombing noong 1971, kung saan siyam ang nasawi at 95 ang nasaktan, kabilang ang kanyang asawang si dating Senador Gerry Roxas.

“Seriously injured in the Plaza Miranda bombing, she remained undeterred and went on to touch countless lives,” pahayag ni Senador Francis Pangilinan. 

(Malubhang nasugatan sa Plaza Miranda bombing, hindi siya natinag at nagpatuloy sa pag-abot sa napakaraming buhay.)

Nagpatuloy si Judy sa pamumuno ng Gerry Roxas Foundation at J. Amado Araneta Foundation, mga institusyong nakatuon sa serbisyong panlipunan.

Ayon kay Rep. Leila de Lima, “From Plaza Miranda to the long years of Martial Law, from the loss of her husband and son to her tireless work with foundations and communities, she showed us what it means to persevere with dignity and to serve without seeking the spotlight.” 

(Mula Plaza Miranda hanggang sa mahabang panahon ng Batas Militar, mula sa pagkawala ng kanyang asawa at anak hanggang sa walang pagod na pagtatrabaho sa mga foundation at komunidad, ipinakita niya kung paano magpatuloy nang may dangal at maglingkod nang hindi naghahangad ng pansin.)

Sa kampanya ni Mar Roxas noong 2016, si Judy ang pangunahing taga-suporta at pinansyal na tagapagtaguyod, bagamat hindi siya kailanman humarap sa publiko bilang politiko.

Tinawag siya ni Erin Tañada, pangulo ng Liberal Party, bilang “a voice of wisdom and a wellspring of strength” (isang tinig ng karunungan at bukal ng lakas).

Tatlong linggo bago ang kanyang pagpanaw, ipinagdiwang ni Judy ang kanyang ika-91 kaarawan. 

Sa isang maikling post, sinabi ni Korina Sanchez-Roxas, maybahay ni Mar: “One of a kind.” 

(Natatangi.)

(Larawan: Mar Roxas | Facebook)