SETYEMBRE 10, 2025 — Inaprubahan ng Senado ang agarang paglilipat kay Brice Hernandez, dating assistant engineer ng DPWH sa Bulacan, mula Camp Crame patungong Pasay City Jail. Ito’y sa kabila ng ilang mambabatas na nais siyang manatili sa Senado.

Si Hernandez ay isa sa mga iniimbestigahan kaugnay ng iregularidad sa mga flood control project. Kasalukuyan siyang nakakulong sa PNP Custodial Center sa ilalim ng kasunduan nina dating Senate President Vicente “Tito” Sotto III at House Speaker Martin Romualdez.

Nagpanukala si Senador Jinggoy Estrada na ilipat si Hernandez sa Pasay City Jail. Sinang-ayunan ito nina Senate Majority Leader Migz Zubiri at Blue Ribbon Committee Chair Ping Lacson. Walang tumutol sa mosyon kaya’t agad itong inaprubahan.

Inatasan ang Office of the Senate Sergeant-at-Arms (OSAA) na isagawa ang transfer sa lalong madaling panahon.

Bagamat lilipat ng kulungan, nananatili pa rin si Hernandez sa legal na kustodiya ng Senado. Nilinaw ito ng bagong Senate President matapos ang botohan.

Nauna nang idineklara si Hernandez na in contempt ng Blue Ribbon Committee matapos paulit-ulit na tanggihan ang mga tanong tungkol sa umano’y pagsusugal sa casino.

Sa pagdinig sa Kamara, binanggit ni Hernandez ang pangalan nina Senador Estrada at Joel Villanueva bilang sangkot umano sa mga kuwestiyonableng proyekto. Mariin itong pinabulaanan ng dalawang senador.

“I categorically deny the accusation,” pahayag ni Estrada. 

(Mariin kong itinatanggi ang paratang.)

“I have never been involved in any flood control project,” giit ni Villanueva. 

(Hindi ako kailanman nasangkot sa anumang flood control project.)

Patuloy ang imbestigasyon sa mga alegasyon habang inaasahang ililipat si Hernandez sa Pasay sa loob ng linggong ito.

(Larawan: YouTube)